Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
AKTUALITET
U arrestua si pjesë e grupit të Visit të Pojës, lirohet nga qelia Rando Aliu
PiranjatPërditësimi i fundit 12 Mars 2026, 09:38
Gjykata e Posaçme kundër Korrupsionit dhe Krimit të Organizuar ka vendosur të ndryshojë masën e sigurisë për Rando Aliun, i arrestuar rreth një vit më parë në kuadër të operacionit të koduar “Ura”.
Raportohet se sipas vendimit të gjykatës masa “arrest në burg” ndaj tij është zëvendësuar me “arrest në shtëpi”, duke i dhënë fund qëndrimit të tij në paraburgim.
Prokuroria e Posaçme (SPAK) dyshon se Aliu ka qenë i përfshirë në transportimin e shumave të mëdha të parave të paligjshme, të cilat sipas hetimeve futeshin në Shqipëri përmes linjave të autobusëve që vinin nga jashtë vendit.
Hetimet për këtë çështje janë zhvilluar në kuadër të operacionit “Ura”, i cili ka në fokus aktivitetet e dyshuara të trafikimit dhe qarkullimit të parave me origjinë kriminale.
Në dosjen hetimore, ai përmendet si i dyshuar i lidhur me grupin kriminal të drejtuar nga Ervis Pojë, i njohur si “Visi i Pojës”, një nga grupet që sipas hetimeve dyshohet se operonin në trafikun ndërkombëtar të drogës dhe aktivitetet e pastrimit të parave.
Me vendimin e fundit, Gjykata e Posaçme ka vlerësuar ndryshimin e masës së sigurisë për të dyshuarin, ndërsa procedimet dhe hetimet për këtë dosje vijojnë.
Kush është Rando Aliu i arrestuar në operacionin “Ura”?
Rando Aliu është një nga personat e arrestuar në kuadër të megaoperacionit ndërkombëtar “Ura”, një aksion i përbashkët mes SPAK, autoriteteve italiane dhe strukturave antimafia, që goditi një rrjet të dyshuar të trafikut të drogës dhe pastrimit të parave me aktivitet në Shqipëri dhe Itali.
Aliu rezulton mes personave ndaj të cilëve u vendos masa e sigurisë “arrest në burg” nga Gjykata e Posaçme (GJKKO), së bashku me disa të dyshuar të tjerë që dyshohet se ishin pjesë e rrjetit kriminal.
Operacioni “Ura” çoi në 52 masa sigurie, ndërsa dhjetëra persona u arrestuan në Shqipëri dhe në vende të tjera të Europës.
Hetimet synonin një organizatë kriminale që dyshohet se merrej me: trafik ndërkombëtar të kokainës dhe heroinës, pastrim të parave dhe aktivitete të tjera të paligjshme të lidhura me krimin e organizuar.
Sipas hetimeve të SPAK dhe autoriteteve italiane, pjesëtarë të këtij rrjeti dyshohet se: organizonin transportin e lëndëve narkotike drejt Italisë dhe vendeve të BE-së, menaxhonin qarkullimin e parave të përfituara nga aktiviteti kriminal, përdornin aplikacione të koduara komunikimi si Sky ECC për të koordinuar aktivitetin.
