Vdekja e biznesmenit në Sarandë/ Policia jep njoftimin: Pritet akti i ekspertimit, ka humbur jetën si pasojë e një shpërthimi

Armando Nelaj

SARANDË- Policia e Sarandës ka dalë me një njoftim lidhur me humbjen e jetës në det, të biznesmenit 52-vjeçar Armando Nelaj. Sipas njoftimit thuhet se Nelaj ka humbur jetën si pasojë e një shpërthimi teksa notonte në det pranë gomones së tij.

Në njoftim thuhet se pritet akti i ekspertimit për arsyen e shpërthimit i cili mbetet ende mister. Fillimisht u raportua se gjithçka ka ndodhur si pasojë e një shpërthimi të një bombole oskigjeni, por duket se kjo pistë ka rënë poshtë.

Polumbarët gjetën në thellësinë e detit pranë vendit të ngjarjes copa metalike qe dyshohet se i përkasin mjetit lundrues në të cilin ndodhej viktima. Nelaj është parë nga dy të huaj të cilët po lundronin me një gomone të vogël drejt jahtit të tyre të ankoruar në radë.

Ata e kanë pyetur nëse kishte problem me diçka por ai i është përgjigjur “Jo”. Vetëm pak sekonda më pas është dëgjuar shpërthimi i cili është shoqëruar me zjarr dhe tym por dhe me zhurmë, që ka tronditur gjithë qytetin.

Njoftimi i Policisë:

Në vijim të informacionit paraprak të dhënë më datë 24.06.2024, informojmë se Komisariati i Policisë Sarandë referoi materialet në Prokurori, pasi në afërsi të Portit Detar Sarandë, dyshohet se ka humbur jetën si pasojë e një shpërthimi, ndërkohë që notonte në det, pranë gomones së tij, shtetasi Armando Nelaj 52 vjeç, banues në Sarandë. Në vijim, pritet akti i ekspertimit për arsyen e shpërthimit. Ndërkohë, në drejtimin e Prokurorisë, vijon puna për zbardhjen dhe dokumentimin e plotë ligjor të rrethanave të ngjarjes.

sarandë armando nelaj