I shumëkërkuari, Ylli Zalla, është arrestuar këtë të hënë në Krujë. Zalla ishte fshehur në një...
AKTUALITET
VIDEO/ Momenti kur Ylli Zalla shoqërohet nga RENEA
PiranjatPërditësimi i fundit 17 Gusht 2026, 10:37
Ylli Zalla, një prej personave më të kërkuar nga policia, është arrestuar këtë të hënë në Krujë.
Operacioni u finalizua nga Forcat Speciale RENEA.
Zalla ishte shpallur në kërkim pas hetimeve të zhvilluara në lidhje me atentatin e ndodhur në Rinas, ku mbetën të vrarë Gilmando Dani dhe Muçi Shaljani.
Dyshimet për atentatin në Rinas
Zalla dyshohet nga autoritetet si bashkëpunëtor në atentatin e nëntorit 2025 në Rinas. Hetimet e lidhin emrin e tij me sigurimin e armëve që dyshohet se janë përdorur nga autorët e ngjarjes.
Në kuadër të hetimeve, në banesën e Zallës në Fushë-Krujë janë zbuluar në periudha të ndryshme arsenale armësh dhe municionesh.
Në një prej kontrolleve u gjetën armë, municion dhe pajisje të tjera, ndërsa në një tjetër kontroll policia sekuestroi një pistoletë me fishekë në fole, një celular, municion luftarak dhe një detektor frekuencash.
Në mars të këtij viti, policia kishte kryer një tjetër kontroll në zonën e banesës së tij, ku u gjetën municione luftarake dhe 14 fitila zjarrpërcjellës. Edhe atëherë, Zalla nuk u arrestua dhe policia vijoi punën për lokalizimin e tij.
I shpëtoi disa operacioneve policore
Përpara arrestimit të sotëm, Zalla kishte mundur t’u shpëtonte disa operacioneve të policisë. Në qershor, gjatë një aksioni të zhvilluar në fshatin Zallë të Fushë-Krujës nga Policia e Tiranës, Komisariati i Krujës dhe RENEA, ai kishte konstatuar praninë e forcave të policisë dhe ishte larguar në drejtim të një zone pyjore.
Në atë operacion u arrestua një 55-vjeçar, i dyshuar për përkrahje të autorit të krimit dhe moskallëzim të krimit, pasi dyshohej se kishte njoftuar Zallën për praninë e policisë.
Arrestimi i sotëm vjen vetëm një ditë pas një tjetër ngjarjeje të rëndë në banesën e tij. Më 16 gusht, një shpërthim me lëndë plasëse dëmtoi rëndë banesën e Zallës në fshatin Zallë dhe dogji edhe automjetin e tij. Rrethanat e shpërthimit janë ende objekt hetimi.
E shkuara e Ylli Zallës
Emri i Ylli Zallës është shfaqur edhe më herët në dosje të ndryshme kriminale.
Sipas raportimeve mediatike, rreth 12 vite më parë ai ishte arrestuar nën dyshimet për prodhim të bombave artizanale, ndërsa ndaj tij kishte pasur edhe akuza lidhur me prodhimin dhe shitjen e narkotikëve.
