Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) raporton se gjatë vitit 2025 ka vijuar ...
AKTUALITET
VOA: Festohen Krishtlindjet në Shqipëri
PiranjatPërditësimi i fundit 25 Dhjetor 2024, 15:29
TIRANË- Në Shqipëri, mijëra besimtarë të krishterë po festojnë Krishtlindjet. Katolikët në mesnatë dhe ortodoksët në orët e para të ditës u mblodhën në objektet e tyre të kultit për të ndjekur ceremonitë fetare. Udhëheqësit fetarë bënë thirrje për më shumë dashuri për njerëzit, duke iu larguar padrejtësive, dhunës dhe konflikteve.
Besimtarë të shumtë nga të gjithë u mblodhën në mesnatë në Katedralen e Shën Palit në Tiranë për të festuar Krishtlindjet, një nga datat të rëndësishme të fesë së tyre.
Ata kënduan këngë dhe lexuan mesazhe nga shkrimet e shenjta, ndërsa ceremonitë i drejtonte Kryeipeshkvi i Dioqezës së Tiranës e Durrësit, Arjan Dodaj.
Në fjalën e tij për Krishtlindje, imzot Dodaj bëri thirrje për paqe, shpresë e dashuri mes njerëzve. Ai tha se besimtarët duhet të gjejnë kurajon të shohin përpara në të ardhmen me shpresë e besim, duke lënë mënjanë padrejtësitë dhe të keqen.
“Biri i Hyjit ka hyrë në historinë e njeriut, një histori që është shënuar me sprova e stërmundime, luftëra e përçarje, konflikte e gjakderdhje, siç shohim fatkeqësisht veçanërisht në këto vitet e fundit gjithmonë e më shumë çdo ditë e më shumë, shpesh herë edhe në rrethanat e jetës tonë të përditshme urbane fatkeqësisht futet kjo përvojë konflikti e jo rrallë herë gjakderdhje”, tha imzot Dodaj.
Mijëra besimtarë ortodokosë vërshuan sot në orët e para të ditës edhe në Katedralen "Ngjallja e Krishtit" në Tiranë, ku u mbajt mesha e shenjtë e Krishtlindjeve.
Ata uruan njëri tjetrin për festën dhe ceremonitë vazhduan me këngë të korit dhe lexime nga shkrimet e shenjta.
Kryepiskopi i Tiranës, Durrësit dhe i Gjithë Shqipërisë, Anastas Janullatos theksoi në mesazhin e vet se besimi dhe dashuria përballojnë sfidat, mposhtin padrejtësitë dhe ligësinë, sepse Perëndia nuk e braktisi njerëzimin, të cilin e mundon egoizmi dhe armiqeësia.
“Përmes përulësisë, e cila ndërthuret gjithmonë me dashurinë, (Perëndia) i kundërvihet krenarisë, rrënjës së përhershme të çdo të keqeje, lakmisë, agresivitetit, konflikteve vrastare, përplasjeve shkatërrimtare. Në epokën tonë të ashpër dhe të veçantë, ku në shumë zona vërshon furishëm urrejtja dhe dhuna, ne të krishterët, që i qëndrojmë besnikë atij që u shfaq në mish, Princit të paqes, le të bëjmë gjithnjë qëndresë, me tërë forcat tona shpirtërore dhe trupore, kudo dhe me aq sa mundemi”, bëri thirrje Kryepiskopi Anastas.
Pas diktaturës komuniste afro gjysmëshekullore, kur u ndalua besimi fetar dhe u vranë e u burgosën qindra klerikë, Shqipëria iu rikthye përhapjes së gjerë të besimeve fetare në të gjitha moshat si dhe harmonisë ndërfetare shumëshekullore./VOA
