Zhdukja e Eglant Koçit vijon të jetë e rrethuar nga misteri. I riu rezulton i humbur prej datës 4 qershor dhe për fatin e tij ende ...
BOTA
Alarm për vizitorët/ Zbulohet breshka grabitqare me kafshim të frikshëm, ndalohet hyrja në ujë
PiranjatPërditësimi i fundit 9 Qershor 2026, 12:14
Autoritetet në Uells kanë lëshuar një paralajmërim urgjent pasi një breshkë grabitqare e njohur si “snapping turtle” u zbulua në një zonë natyrore shumë të frekuentuar nga vizitorët.
Breshka, e quajtur Sheila, u gjet duke notuar në një përrua pyjor në Penllergare Valley Woods. Përgjegjësit e parkut paralajmëruan notarët dhe pronarët e qenve të qëndronin larg ujit, pasi zvarraniku 35 centimetra i gjatë konsiderohet potencialisht i rrezikshëm.
Më vonë, Sheila u kap në mënyrë të sigurt dhe u transportua mbi 350 kilometra drejt Qendrës Kombëtare për Mirëqenien e Zvarranikëve në Kent, ku ekspertët thanë se ndodhet në gjendje të shkëlqyer shëndetësore.
Kjo specie është vendase në Amerikën e Veriut dhe Amerikën Qendrore. Ekspertët besojnë se breshka është lëshuar qëllimisht në natyrë, një veprim i ndaluar me ligj në Britani.
Breshkat grabitqare njihen për nofullat e tyre shumë të fuqishme, të ngjashme me sqepin, të afta të shkaktojnë dëmtime serioze. Sipas specialistëve, ato janë veçanërisht mbrojtëse dhe më agresive kur ndodhen në tokë.
Drejtori i Qendrës Kombëtare për Mirëqenien e Zvarranikëve, Chris Newman, e krahasoi kafshimin e tyre me “futjen e dorës në derën e një makine dhe përplasjen e saj me forcë”.
“Breshkat nuk janë agresive, por mbrojnë veten. Kafshimi do të ishte jashtëzakonisht i dhimbshëm dhe kur kafshojnë nuk lëshojnë menjëherë,” tha ai.
Menaxherët e parkut njoftuan vizitorët: “Mos hyni në ujë dhe mbajini larg edhe qentë. Ekipi ynë po punon për kapjen e sigurt të breshkës me ndihmën e ekspertëve. Nëse e shihni, njoftoni menjëherë stafin.”
Pas shpëtimit, Sheila, e cila peshon rreth një kilogram, kaloi një periudhë të shkurtër stresi, por tani po rikuperohet normalisht.
Ekspertët dyshojnë se breshka ishte mbajtur si kafshë shtëpiake ekzotike dhe më pas është braktisur. Sipas tyre, këto kafshë nuk arratisen lehtësisht nga mjediset ku mbahen.
“Fatkeqësisht, çdo vit kemi disa raste të breshkave grabitqare të lëshuara në natyrë. Kjo është plotësisht e paligjshme. Përveç rrezikut për njerëzit, ato mund të dëmtojnë edhe ekosistemin, pasi ushqehen me peshq, tritona dhe specie të tjera vendase,” shpjegoi Newman.
Edhe ekspertët e organizatës për mbrojtjen e kafshëve, RSPCA, theksuan se lëshimi i specieve jo-vendase në natyrë është i ndaluar dhe u bënë thirrje qytetarëve të mos përpiqen t’i kapin vetë këto kafshë, por të kontaktojnë specialistët përkatës./Përktheu Piranjat News
