Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
BOTA
Banka Qendrore Europiane i mban të pandryshuara normat e interesit, thotë se presionet e çmimeve të brendshme janë ende të larta
M.B.Përditësimi i fundit 18 Korrik 2024, 15:31
Foto ilustruese
FRANKFURT- Banka Qendrore Europiane i la të pandryshuara normat e interesit, pas uljes së tyre në qershor.
“Politika monetare po i mban kushtet e financimit të kufizuara. Në të njëjtën kohë, presionet e brendshme të çmimeve janë ende të forta, inflacioni i shërbimeve është i lartë dhe inflacioni total ka të ngjarë të qëndrojë mbi objektivin edhe vitin e ardhshëm”, tha në një deklaratë Këshilli Drejtues i BQE-së.
Vendimi – i cili mban normën bazë të interesit në 3.75% – pritej gjerësisht mes shqetësimeve të vazhdueshme mbi presionet inflacioniste, veçanërisht nga tregu i punës. Inflacioni total i Eurozonës u ul në 2.5% në qershor, nga 2.6% më parë, por inflacioni bazë – duke përjashtuar komponentët e paqëndrueshëm të energjisë dhe ushqimit – doli mbi parashikimet, duke arritur 2.9%.
Analistët presin që banka qendrore të ketë më shumë të dhëna për pagat, rritjen ekonomike dhe produktivitetin, përpara se të marrë vendimin për të lehtësuar më tej politikën monetare. Kur uli normën bazë në qershor, për herë të parë që nga viti 2019, BQE përmendi si faktorë kryesorë që ndikuan perspektivën e inflacionit, dinamikën e inflacionit bazë dhe forcën e ndikimit të politikës monetare.
Në deklaratën e mbledhjes së korrikut, Këshilli Drejtues tha se do të vazhdonte të monitoronte këto faktorë dhe se “nuk po angazhohej paraprakisht për një drejtim të caktuar për normat”.
Megjithatë, vlerësimet e tregut sugjerojnë pritshmëri të qëndrueshme edhe për dy ulje të tjera me 25 pikë bazë këtë vit, në shtator dhe dhjetor. /Monitor
