Një marinar 24-vjeçar i Marinës Mbretërore Britanike është paraqitur në gjykatë, i akuzuar për përgatitje p&...
BOTA
Britania dhe Gjermania partneritet të ri sigurie kundër kërcënimeve hibride, Burnham takohet me Merz në Berlin
PiranjatPërditësimi i fundit 8 Tetor 2026, 12:22
Kryeministri britanik Andy Burnham udhëton sot në Berlin, ku do të zhvillojë takimin e parë ballë për ballë me kancelarin gjerman Friedrich Merz. Në qendër të vizitës do të jetë forcimi i bashkëpunimit mes dy vendeve përballë kërcënimeve të sigurisë, veçanërisht sabotimeve, sulmeve kibernetike dhe formave të tjera të luftës hibride që lidhen kryesisht me Rusinë.
Britania e Madhe dhe Gjermania do të nisin një partneritet të ri për kundërvënien ndaj kërcënimeve hibride. Marrëveshja parashikon shkëmbim informacioni dhe koordinim të veprimeve për identifikimin, parandalimin dhe pengimin e aktiviteteve që mund të cenojnë sigurinë e dy vendeve.
Në fokus do të jetë edhe mbrojtja e infrastrukturës kritike, përfshirë rrjetet e energjisë, komunikimit, transportit dhe sisteme të tjera thelbësore për funksionimin e shoqërisë.
Me termin “kërcënime hibride” përfshihen një sërë veprimesh që mund të përdoren nga shtetet kundërshtare për të dëmtuar ose destabilizuar një vend pa hyrë në një konflikt të drejtpërdrejtë ushtarak. Në këtë kategori bëjnë pjesë sulmet kibernetike, sabotimet, ndërhyrjet ndaj infrastrukturës dhe forma të tjera presioni.
Gjatë takimit, Burnham dhe Merz pritet të diskutojnë gjithashtu mbështetjen për Ukrainën, zhvillimet në Lindjen e Mesme dhe pasojat e ndërprerjeve të rrugëve kryesore të tregtisë ndërkombëtare, përfshirë situatën rreth Ngushticës së Hormuzit.
Në Berlin do të zhvillohet edhe një Forum Rajonal për Rritjen Ekonomike Britani-Gjermani, ku do të marrin pjesë drejtues të kompanive të mëdha nga të dyja vendet. Forumi synon rritjen e investimeve, forcimin e bashkëpunimit industrial dhe nxitjen e projekteve të përbashkëta në fusha të teknologjisë dhe inovacionit.
Një tjetër moment i rëndësishëm i vizitës do të jetë hyrja në fuqi e Traktatit të Kensingtonit. Burnham dhe Merz do të shkëmbejnë zyrtarisht dokumentet e ratifikimit të marrëveshjes, duke formalizuar angazhimin për thellimin e marrëdhënieve dypalëshe. Traktati, i nënshkruar në korrik të vitit 2025, synon të zgjerojë bashkëpunimin mes Britanisë së Madhe dhe Gjermanisë në siguri, mbrojtje, shkencë, teknologji dhe ekonomi.
Para vizitës, Burnham deklaroi se sulmet ndaj infrastrukturës, bizneseve dhe demokracive nuk janë më një kërcënim i largët.
“Sulmet ndaj infrastrukturës sonë, bizneseve tona dhe demokracive tona nuk janë një kërcënim i largët. Ato prekin shtëpitë dhe vendet e punës dhe synojnë të na bëjnë më të dobët dhe më të përçarë”, tha kryeministri britanik.
“Britania e Madhe dhe Gjermania po bashkojnë forcat për ta zbuluar, ekspozuar dhe penguar këtë veprimtari”, shtoi ai, duke theksuar se siguria dhe rritja ekonomike janë të lidhura ngushtë dhe duhet të sjellin përfitime për komunitetet në të dy vendet.
