Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
BOTA
DOGE e Elon Musk i dërgoi kërkesa për informacion/ Drejtuesja e Administratës së Sigurimeve Shoqërore të SHBA jep dorëheqjen
e. dPërditësimi i fundit 18 Shkurt 2025, 18:17
foto ilustruese
SHBA- Komisionerja në detyrë e Administratës së Sigurimeve Shoqërore dha dorëheqjen pas kërkesave nga ekipi i Departamentit të Efikasitetit të Qeverisë, DOGE, për qasje në informacionet e përfituesve të Sigurimeve Shoqërore, sipas dy personave me njohuri nga largimi i zyrtares, të cilët folën me kusht që të mbeteshin anonim.
Largimi i Komisioneres në detyrë Michelle King nga agjencia gjatë fundjavës, pas më shumë se 30 vitesh pune në të, pasoi vendimin e saj për të refuzuar kërkesën e punonjësve të DOGE për qasje në të dhënat personale të Administratës së Sigurimeve Shoqërore, thanë dy burimet anonime të hënën.
Shtëpia e Bardhë e zëvendësoi atë me zotin Leland Dudek, i cili aktualisht punon në Administratën e Sigurimeve Shoqërore.
Zëdhënësi i Shtëpisë së Bardhë, Harrison Fields, lëshoi një deklaratë të hënën në mbrëmje duke thënë: “Presidenti Trump ka emëruar zotin Frank Bisignano për postin e udhëheqësit të Administratës së Sigurimeve Shoqërore dhe ne presim që ai të konfirmohet (nga Senati) me shpejtësi në javët e ardhshme. Ndërkohë, agjencia përkohësisht do të drejtohet nga një ekspert karriere kundër abuzimit të fondeve në Administratën e Sigurimeve Shoqërore, i cili do të jetë ushtrues i detyrës së komisionerit”.
Dorëheqja e komisioneres në detyrë Michelle King nga Administrata e Sigurimeve Shoqërore është një nga disa largime të zyrtarëve të rangut të lartë të shqetësuar për mundësinë e qasjes së paligjshme të personelit të DOGE në dhënat personale të taksapaguesve.
DOGE ka patur qasje në sistemin e pagesave të Departamentit të Thesarit dhe po përpiqet të fitojë qasje në të dhënat e Agjencisë së Taksave.
Që kur Presidenti republikan Donald Trump filloi mandatin e dytë në Shtëpinë e Bardhë, këshilltari i tij miliarder Elon Musk hyri me shpejtësi në agjencitë federale përmes grupit DOGE.
Nancy Altman, presidente e organizatës “Social Security Works”, që merret me mbrojtjen e përfitimeve të Sigurimeve Shoqërore, kritikoi përpjekjet e Departamentit të Efikasitetit të Qeverisë duke thënë se "nuk ka asnjë mënyrë për të shprehur me fjalë se sa serioze është kjo shkelje. Nga ajo që unë kam kuptuar deri me tani, shkelja tashmë ka ndodhur."
"Informacioni i mbledhur dhe i mbajtur në mënyrë të sigurt nga Administrata e Sigurimeve Shoqërore është shumë i ndjeshëm", tha ajo. "Administrata e Sigurimeve Shoqërore ka të dhëna për të gjithë ata që kanë një numër të Sigurimeve Shoqërore, pra pothuajse të gjithë amerikanët, të gjithë ata që kanë sigurime shëndetësore qeveritare dhe çdo amerikan me të ardhura të ulëta që ka aplikuar për programet e ndihmave sociale."
"Nëse ka një qëllim të keq për të ndëshkuar armiqtë e perceptuar, dikush mund të fshijë të dhënat tuaja të të ardhurave, duke e bërë të pamundur marrjen e përfitimeve të Sigurimeve Shoqërore dhe sigurimeve shëndetësore për të cilat ata mund të kenë dhënë kontribute."
E ardhmja e Sigurimeve Shoqërore ishte një çështje politike që u debatua gjatë fushatës për zgjedhjet e vitit 2024. Rreth 72.5 milionë njerëz, përfshirë pensionistë, persona me aftësi të kufizuara dhe fëmijë, marrin përfitime nga sigurimet shoqërore./VOA
