Donald Trump ndalon studentët e huaj të studiojnë në Harvard/ Princesha Elizabeth e Belgjikës përballet me një problem të papritur, i vihen studimet në rrezik

SHBA- Princesha Elizabeth e Belgjikës po përballet me një problem të papritur, pasi pas vendimit të Donald Trump për të ndaluar studentët e huaj nga Harvard, ajo sheh se studimet e saj po vihen në rrezik. Trashëgimtarja 23-vjeçare e fronit belg sapo ka përfunduar vitin e parë të studimeve në Harvard. Por të enjten, qeveria amerikane ia hoqi universitetit të drejtën për të regjistruar studentë ndërkombëtarë.

Vendimi ka të bëjë edhe me studentët e huaj aktualë, të cilët duhet ose të transferohen në universitete të tjera ose të humbasin statusin e tyre ligjor në SHBA. Në të njëjtën kohë, qeveria amerikane po kërcënon ta zgjerojë masën edhe në institucione të tjera universitare.

"Princesha Elizabeth sapo ka përfunduar vitin e saj të parë. Ndikimi i vendimit të administratës Trump do të bëhet më i qartë në ditët/javët në vijim. Aktualisht po e hetojmë situatën", tha zëdhënësja e pallatit mbretëror belg, Laure Vandoorne.

"Po e analizojmë situatën për momentin dhe do t'i lëmë gjërat të qetësohen. Shumë gjëra mund të ndodhin në ditët dhe javët në vijim", shtoi drejtori i komunikimit të pallatit, Xavier Baert.

Diplomë Masteri në politika publike

Princesha Elizabeth po studion politika publike në Harvard, një program dyvjeçar pasuniversitar që, sipas faqes së internetit të universitetit, zgjeron perspektivat e studentëve dhe mpreh aftësitë e tyre.

Princesha është më e madhja nga katër fëmijët e Mbretit Philippe dhe Mbretëreshës Mathilde dhe, si e tillë, është trashëgimtarja e fronit. Përpara se të ndiqte Harvardin, ajo mori një diplomë në histori dhe politikë nga Universiteti i Oksfordit në Mbretërinë e Bashkuar. Megjithatë, Harvard ngriti një padi në gjykatën federale në Boston, duke argumentuar se vendimi i qeverisë amerikane shkel Amendamentin e Parë të Kushtetutës së SHBA-së, si dhe ligjet federale.