Kreu i Partisë Demokratike, Sali Berisha, në një dalje për mediat pas mbledhjes së grupit parlamentar demokrat, ka sulmuar qeverin&eu...
BOTA
Draghi paralajmëron: Europa rrezikon të ndahet
PiranjatPërditësimi i fundit 2 Shkurt 2026, 18:37
Europa rrezikon të bëhet e ndarë, e varur nga të tjerët dhe e deindustrializuar, paralajmëroi ish-kreu i Bankës Qendrore Europiane, Mario Draghi, gjatë ceremonisë në Belgjikë ku iu dha titulli doktor honoris causa.
Fjalimi i tij u përqendrua tek sfidat e Unionit Europian në një botë ku rendi global po shembet dhe presioni nga fuqitë e mëdha po rritet çdo ditë.
“Midis të gjithë atyre që ndodhen të ngushtuar mes Shteteve të Bashkuara dhe Kinës, vetëm europianët kanë opsionin të bëhen një fuqi e vërtetë. Duhet të vendosim: a mbetemi thjesht një treg i madh, nën prioritetet e të tjerëve, apo të hedhim hapat për të bërë Evropën një fuqi strategjike?”, tha Draghi.
Sipas Draghit, për të arritur statusin e një fuqie, Europa nuk mund të qëndrojë vetëm si një konfederatë e shteteve, por duhet të kalojë në një federatë. Ai kujtoi se kur Evropa është integruar, si në tregun e vetëm, konkurrencën, politikën monetare dhe marrëveshjet tregtare, është respektuar dhe ka negociuar si një aktor i vetëm. Shembujt më të fundit janë marrëveshjet me Indinë dhe Amerikën Latine, ku Bashkimi Evropian ka treguar forcën e një subjekti të unifikuar.
Draghi paralajmëroi gjithashtu për rreziqet e një rendi global që po shembet. “Rënia e këtij rendi nuk është në vetvete kërcënim; do të ishte e dhimbshme të kishim më pak tregti dhe rregulla më të dobëta. Por kërcënimi vërtetë është ajo që do ta zëvendësojë atë rend”, theksoi ai.
Ish-presidenti i Këshillit Europian shtoi se Shtetet e Bashkuara shohin fragmentimin e Evropës si të dobishëm për interesat e tyre, ndërsa Kina po imponon modelin e saj të rritjes duke ngarkuar kostot tek të tjerët. “Integrimi europian nuk ndërtohet mbi forcën, por mbi vullnetin e përbashkët; nuk mbi nënshtrimin, por mbi përfitimin e ndarë”, tha Draghi.
Deklarata e tij erdhi pak ditë para vertices informale për konkurrencën europiane, ku ai dhe ish-kryeministri italian Enrico Letta do të diskutojnë mbi sfidat e tregut të vetëm dhe mënyrat për të ruajtur konkurrencën dhe unitetin e BE. Presidenti i Këshillit Europian, Antonio Costa, e përshkroi këtë takim si një mundësi për të ndarë vizionin strategjik për një Evropë të fuqishme dhe të bashkuar, në një botë ku rreziqet gjeopolitike dhe fragmentimi i mundshëm janë në rritje.
Draghi përfundoi mesazhin e tij me një paralajmërim të qartë: vetëm një Evropë e bashkuar dhe strategjikisht e fuqishme mund të shmangë ndarjen, deindustrializimin dhe varësinë nga aktorët globalë, duke ruajtur jo vetëm tregun e vetëm, por edhe rolin e saj si fuqi botërore.
