Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
Dy shqiptarë tentuan të korruptonin një gjyqtar në SHBA me 100 mijë dollarë për të shpëtuar trafikantin e kokainës! (EMRAT)
PiranjatPërditësimi i fundit 3 Shkurt 2026, 09:53
Dy shtetas shqiptarë janë arrestuar në New York City, pasi tentuan të korruptonin një anëtar jurie me 100 mijë dollarë, për të ndikuar në vendimin e gjyqit kundër ish-boksierit Goran Gogic, i akuzuar për trafikimin e rreth 18 tonëve kokainë drejt Shteteve të Bashkuara.
Sipas dokumenteve zyrtare të drejtësisë amerikane, të siguruara nga “MA Shqip”, të arrestuarit janë Valmir Krasniqi dhe Afrim Kupa, banorë të Staten Island, të cilët dyshohet se organizuan një skemë të mirëfilltë për të blerë votën e një anëtari jurie në procesin penal ndaj Gogic.
Nga mediat mësohet se nga dosja hetimore se në mesin e nëntorit 2025, të dy të dyshuarit, përmes një ndërmjetësi me inicialet M.F., kontaktuan një anëtar jurie dhe i ofruan deri në 100 mijë dollarë cash në këmbim të votës së tij për ta shpallur “jo fajtor” të pandehurin në fund të gjyqit.
Anëtari i jurisë e raportoi menjëherë rastin, duke vënë në lëvizje FBI-në dhe prokurorinë federale.
Pas arrestimit, të gjithë anëtarët e jurisë së gjyqit ndaj ish-boksierit u shpërndanë dhe u caktua një juri e re. Sipas procedurave në SHBA, anëtarët e jurisë përzgjidhen nga qytetarë amerikanë përmes shortit dhe qëndrojnë në gjykatë deri në përfundimin e procesit.
Hetimet tregojnë se më 13 nëntor 2025, Krasniqi dhe Kupa u takuan në Staten Island për të koordinuar planin e ryshfetit. Dy ditë më vonë, oferta iu komunikua drejtpërdrejt anëtarit të jurisë. Më 16 nëntor, ata u takuan sërish në banesën e Krasniqit për të diskutuar mënyrën e pagesës, ku u përmend shuma prej 100 mijë dollarësh cash. Një ditë më pas, të dy u arrestuan nga autoritetet federale.
Gjatë kontrollit, policia gjeti te Kupa dokumente me emrin, adresën dhe vendin e punës së anëtarit të jurisë, ndërsa te Krasniqi u sekuestrua një fotografi e tij, e përdorur për koordinimin e skemës kriminale.
Gjyqi për të cilin u tentua manipulimi lidhej me një nga çështjet më të mëdha të trafikut të drogës në historinë e SHBA-së. Prokuroria amerikane akuzon Gogic se, në periudhën 2018–2019, organizoi transportin e sasive gjigante të kokainës përmes anijeve tregtare nga Amerika Latine drejt Evropës dhe Shteteve të Bashkuara.
Një nga goditjet më të mëdha ndodhi më 19 qershor 2019, kur autoritetet amerikane sekuestruan rreth 17,956 kilogramë kokainë, afro 18 tonë, në Portin e Filadelfias, një nga sekuestrimet më të mëdha në historinë e doganave amerikane.
Sipas prokurorisë, Gogic bashkëpunonte me furnitorë në Kolumbi, ekuipazhe anijesh dhe rrjete portuale, duke përdorur SHBA-në si pikë tranziti për trafikun e drogës drejt Evropës. Nëse shpallet fajtor, ai rrezikon burgim të përjetshëm.
Autoritetet amerikane kanë deklaruar se tentativa për të blerë jurinë përbën një sulm të drejtpërdrejtë ndaj sistemit të drejtësisë dhe se raste të tilla do të ndëshkohen maksimalisht. Krasniqi dhe Kupa akuzohen për pengim të drejtësisë dhe komplot kriminal, vepra që parashikojnë shumë vite burg.
Ndërkohë, “MA Shqip” ka mësuar se gjyqi ndaj Gogic pritet të rifillojë me një juri të re dhe me masa të shtuara sigurie, ndërsa hetimet për rrjetin që qëndron pas tentativës së ryshfetit vazhdojnë.
Autoritetet theksojnë se të pandehurit konsiderohen të pafajshëm deri në provimin e fajësisë në gjykatë, por rasti po shihet si një nga përpjekjet më serioze për manipulim të drejtësisë në vitet e fundit në SHBA.
Pjesë nga përgjimet
Sipas dosjes hetimore, një hetim në momentet e fundit siguroi një regjistrim audio nga një bisedë brenda një banese në Staten Island, ku të dyshuarit diskutonin në anglisht dhe shqip planin për ryshfetin.
Në regjistrim dëgjohen këto dialogë:
M.F: “Si do t’i paguajnë atij? Kush do t’ia japë paratë?”
