Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
BOTA
Sulmet izraelite në një strehimore vrasin të paktën 46 persona në Gaza
n.fPërditësimi i fundit 26 Maj 2025, 10:05
GAZA- Sulmet izraelite vranë të paktën 46 njerëz në Rripin e Gazës, të hënën, përfshirë 31 në një shkollë të shndërruar në strehimore, e cila u godit teksa njerëzit po flinin, duke i vënë flakën gjësendeve të tyre, bënë të ditur zyrtarët lokalë shëndetësorë.
Ushtria izraelite tha se kishte në shënjestër militantët që operonin nga shkolla, raporton Associated Press. Izraeli përtëriu ofensivën e tij në mars, pasi i dha fund një armëpushimi me Hamasin, grupin palestinez që Shtetet e Bashkuara të Amerikës dhe Bashkimi Evropian e kanë shpallur organizatë terroriste.
Izraelitët janë zotuar se do ta marrin kontrollin e Gazës dhe se do të vazhdojnë të luftojnë, derisa Hamasi të shkatërrohet apo të çarmatoset, dhe derisa ai të kthejë 58 pengjet e mbetura – një e treta prej të cilave besohet të jenë gjallë – që u morën gjatë sulmit të 7 tetorit të 2023-tës, e cila nxiti luftën.
Izraeli nisi të lejonte futjen e një sasie të vogël ndihmash humanitare në Gazë javën e kaluar, pasi kishte bllokuar hyrjen e të gjitha ushqimeve, ilaçeve, karburanteve dhe mallrave të tjera për 2 muaj e gjysmë.
Grupet humanitare kanë paralajmëruar se banorët e Gazës mund të vdesin urie dhe thonë se ndihmat që kanë ardhur ditëve të fundit janë aspak të mjaftueshme për t’i përmbushur nevojat e mëdha.
Një sistem i ri i ndihmave, i mbështetur nga Izraeli dhe nga Shtetet e Bashkuara, por i refuzuar nga agjencitë e Organizatës së Kombeve të Bashkuara dhe nga organizatat humanitare pritet të nisë operacionet të hënën, pavarësisht dorëheqjes së amerikanit që udhëhoqi nismën, i cili tha se ajo nuk do të mund të operonte në mënyrë të pavarur.
Izraeli thotë se planifikon ta marrë kontrollin e plotë të Gazës dhe të lehtësojë atë që ai e quan emigrim vullnetar të mbi 2 milion banorëve të saj, një plan i hedhur poshtë nga palestinezët dhe nga shumica e komunitetit ndërkombëtar.
Fushata ushtarake e Izraelit ka shkatërruar pjesë të mëdha të Gazës dhe ka zhvendosur brenda vendit rreth 90 për qind të popullatës së saj. Shumica prej tyre janë shpërngulur disa herë.
Sulmi në shkollën në lagjen Daraxh të Qytetit të Gazës plagosi edhe më shumë se 55 njerëz, tha Fahmy Awad, shef i shërbimit të emergjencave të Ministrisë së Shëndetësisë në Gazë. Ai bëri të ditur se një baba dhe pesë fëmijët e tij ishin në mesin e të vdekurve.
Fahmy tha se shkolla u godit tri herë teksa njerëzit po flinin. Pamjet që qarkulluan online shfaqën shpëtimtarët duke u munduar t’i shuanin zjarret dhe duke nxjerrë viktimat e shkrumbuara.
Ushtria izraelite tha se sulmet e saj kishin në shënjestër një komandë dhe një qendër kontrolli të militantëve brenda shkollës, të cilën Hamasi dhe Xhihadi Islamik e përdornin për të mbledhur informata për sulmet.
Izraeli fajëson Hamasin për vdekjen e civilëve, për shkak se ai operon në zona të banimit.
Një sulm tjetër, në një shtëpi, vrau 15 anëtarë të së njëjtës familje, përfshirë pesë gra dhe dy fëmijë, sipas spitalit Shifa në Qytetin e Gazës, i cili pranoi kufomat.
Në anën tjetër, militantët palestinezë lëshuan tri raketa nga Gaza, dy prej të cilave nuk arritën ta kapërcenin territorin, ndërsa e treta u pengua, tha ushtria izraelite.
Lufta në Gazë nisi kur militantët e udhëhequr nga Hamasi sulmuan jugun e Izraelit, duke vrarë rreth 1.200 persona, kryesisht civilë, dhe duke marrë peng 251 të tjerë. Pjesëtarët e Hamasit janë ende duke i mbajtur dhjetëra pengje, ndërsa shumë të ttjerë janë liruar në kuadër të marrëveshjeve për armëpushim dhe të tjera.
Ofensiva hakmarrëse e Izraelit, e cila ka shkatërruar pjesë të mëdha të Gazës, ka vrarë mbi 55.000 palestinezë, kryesisht gra dhe fëmijë, sipas Ministrisë së Shëndetësisë në Gazë, e cila nuk bën dallimin ndërmjet civilëve dhe luftëtarëve në llogaritjet e saj./ REL
