Kur qeveria përballet me protesta dhe skandale, zgjedh të fajësojë Iranin. Por alibia e luftës hibride nuk mbulon dot krizën e t...
BOTA
Franca kërkon zhvillimin e një stërvitjeje të NATO-s në Groenlandë: Jemi të gatshëm të kontribuojmë në të
PiranjatPërditësimi i fundit 21 Janar 2026, 10:32
Franca dëshiron që në Groenlandë të zhvillohet një “stërvitje e NATO-s” dhe shpreh gatishmërinë për të kontribuar në të, njoftoi sot Pallati Elize, në një kohë kur presidenti amerikan Donald Trump vijon të përsërisë se dëshiron ta marrë nën kontroll këtë territor autonom të Danimarkës.
Deklaratat dhe kërcënimet e Trump lidhur me Groenlandën kanë ftohur më tej marrëdhëniet tashmë të ndërlikuara mes presidentit amerikan, i cili pritet të mbajë një fjalim në Forumin Ekonomik të Davosit, dhe fuqive evropiane.
“Franca kërkon zhvillimin e një stërvitjeje të NATO-s në Groenlandë dhe është e gatshme të kontribuojë në të”, thuhet në deklaratën e presidencës franceze.
Disa vende evropiane, përfshirë Francën, Gjermaninë dhe Mbretërinë e Bashkuar, kanë dërguar tashmë personel ushtarak në këtë territor për një mision vëzhgues, në kuadër të përgatitjeve për stërvitje që organizon Danimarka me aleatë të NATO-s.
Këto manovra, megjithatë, zhvillohen jashtë kornizës zyrtare të Aleancës Atlantike dhe pa përfshirjen e Shteteve të Bashkuara.
Kjo situatë ka shkaktuar më herët zemërimin e Donald Trump, i cili ka kërcënuar aleatët që marrin pjesë në këto stërvitje me vendosjen e tarifave të reja doganore deri në 25%.
Presidenti amerikan këmbëngul se Groenlanda, e pasur edhe me burime minerare, është jetike për sigurinë e Shteteve të Bashkuara dhe të NATO-s përballë Rusisë dhe Kinës.
Sipas Parisit, një stërvitje e NATO-s do të mundësonte përfshirjen e Uashingtonit dhe do të theksonte faktin se vendet evropiane e marrin seriozisht çështjen e sigurisë në Arktik.
