Reperi i njohur kosovar, Capital T, u ka bërë thirrje mediave në Kosovë që tu kushtojnë më shumë vëmendje zhvillime...
BOTA
Gjykata Kushtetuese e Bosnjës pezullon përkohësisht Ligjin për Zgjedhjet të Republikës Sërpska
n.fPërditësimi i fundit 24 Korrik 2024, 22:58
Gjyqtarët e Gjykatës Kushtetuese
BOSNJË- Gjykata Kushtetuese e Bosnje-Hercegovinës e ka pezulluar Ligjin për Zgjedhjet të Republikës Sërpska, njërin prej dy entiteteve në këtë vend. Gjykata ka thënë në vendim se ky ligj, që është miratuar nga Asambleja Kombëtare e Republikës Sërpska, më 9 prill, është pezulluar përkohësisht, derisa të merret një vendim përfundimtar për të.
Vendimi është marrë pas kërkesës ndaj gjykatës për të vlerësuar nëse ligji është në përputhje me Kushtetutën e Bosnje-Hercegovinës. Kërkesën e ka bërë Denis Zvizdiq, zëvendëskryetari i parë i Dhomës së Përfaqësuese të Parlamentit të Bosnjës.
Ligji për Zgjedhjet i Republikës Sërpska rregullon çështje që veçse janë të rregulluara me Ligjin për Zgjedhjet të Bosnje-Hercegovinës, dhe me këtë ligj, kompetencat e Komisionit Qendror të Zgjedhjeve i transferohen Komisionit të entitetit, dhe kështu dispozitat e Ligjit për Zgjedhjet të Bosnjës, bëhen të pavlefshme, është thënë në vendimin e Gjykatës Kushtetuese.
Në vendim është thënë, po ashtu, se është e domosdoshme të gjendet një përgjigje nëse Asambleja Kombëtare e Republikës Sërpska, ka autoritet për të rregulluar çështje që veçse janë të rregulluara në nivel shtetëror.
Gjykata Kushtetuese e Bosnjës ka thënë se rregullimi i zgjedhjeve përbën një prej fushave kyçe për të garantuar zgjedhje të lira, të drejta dhe transparente, të cilat reflektojnë vullnetin e qytetarëve. Zgjedhjet lokale në Bosnje-Hercegovinë janë planifikuar të mbahen më 6 tetor të këtij viti./ REL
