E bija e dëshmorit të UÇK, Tahir Sinani, Rugova Sinani ka reaguar ashpër pas publikimit nga Taulant Balla të një dokumenti t&eum...
BOTA
Hajdutët godasin në zemër të São Paulo-s, zhduken nga biblioteka 13 veprat e Matisses dhe Portinarit
PiranjatPërditësimi i fundit 8 Dhjetor 2025, 15:27
Dy persona të armatosur kanë vjedhur tetë gravura të artistit francez Henri Matisse dhe të paktën pesë të tjera të piktorit brazilian Cândido Portinari nga një bibliotekë në São Paulo. Zyrtarët brazilianë thonë se hajdutët kërcënuan një roje sigurie dhe një çift të moshuar që po vizitonin bibliotekën, përpara se të largoheshin në këmbë me veprat e artit.
Siç shkruan BBC, hajdutët hynë në bibliotekë nga hyrja kryesore rreth orës 10:00 të së dielës së 7 dhjetorit, dhe u larguan nga e njëjta rrugë, duke u drejtuar drejt stacionit më të afërt të metrosë. Grabitja vjen më pak se dy muaj pasi bota e artit u trondit nga një hyrje e guximshme me forcë në muzeun e Luvrit në Paris, ku hajdutët morën me vete stoli me vlerë të pallogaritshme.
Gravurat e vjedhura nga Biblioteca Mário de Andrade të dielën ishin pjesë e një ekspozite të përbashkët me Muzeun e Artit Modern të São Paulos. Hajdutët synuan ekspozitën e quajtur “Nga libri në muze”, pikërisht në ditën e saj të fundit. Biblioteca Mário de Andrade është biblioteka e dytë më e madhe e vendit dhe zyrtarët thonë se ndërtesa e saj në qendër të São Paulos ishte e pajisur me kamera me teknologji të njohjes së fytyrës.
Kryebashkiaku i São Paulos u tha mediave lokale se hajdutët tashmë janë identifikuar, por deri tani janë ende në arrati. Zyrtarët nuk kanë publikuar ende një listë të detajuar të veprave të vjedhura, por sipas gazetës Folha de São Paulo, një kolazh i Matisse-s i krijuar për librin e edicionit të kufizuar Jazz është ndër veprat e marra. Matisse konsiderohet si një nga artistët më me ndikim të shekullit të 20-të dhe kritikët e artit thonë se vlera e veprave të vjedhura është “e pallogaritshme”.
Hajdutët morën gjithashtu të paktën pesë gravura të Portinari-t, të krijuara për të ilustruar një botim të veçantë të romanit Menino de Engenho (djali i Plantacionit) nga shkrimtari brazilian José Lins do Rego. Portinari, i cili shpesh pikturonte punëtorë ruralë dhe bujq, konsiderohet si një nga artistët më të rëndësishëm të modernizmit brazilian.
