Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
BOTA
Atentati ndaj pronarit grek dhe punëtorit shqiptar, zbardhet dëshmia e 22-vjeçarit: Pronari më ka kapur me zor
PiranjatPërditësimi i fundit 16 Tetor 2025, 23:04
Detaje të reja janë zbardhur nga hetimet për vrasjen e pronarit grek të një kampingu në Finikounda dhe punëtorit të tij shqiptar. 22-vjeçari i arrestuar si bashkëpunëtor ka rrëfyer para policisë greke versionin e tij për ngjarjen tragjike që tronditi vendin fqinj. Sipas dëshmisë së tij, ai kishte njohur viktimën në vitin 2022 përmes nipit të tij, të cilin e kishte takuar në një dyqan ushqimesh të shëndetshme në Athinë.
Më pas, gjatë verës së atij viti, ai ishte strehuar për një periudhë në kampingun e 68-vjeçarit në Finikounda. I riu pretendoi se gjatë qëndrimit atje ishte abuzuar seksualisht nga pronari i kampingut, i cili më pas i kishte dhënë 400 euro “për të heshtur”.
Pas këtij episodi, ai tha se kishte rënë në përdorim droge dhe kishte tentuar disa herë të merrte para nga i moshuari, pa sukses. Në dëshminë e tij, 22-vjeçari tregoi se i kishte folur një miku të tij greko-britanik për ngjarjen, i cili i kishte thënë: “Do të shkojmë bashkë këtë herë dhe do ta detyroj me armë të më japë portofolin.”
Në natën mes 4 dhe 5 shtatorit, të dy u nisën nga Athina drejt Kalamatës me një skuter “Honda” dhe një kuti kitare, ku sipas policisë ndodheshin një revolver argjendi dhe një paruke bjonde. Ata shkuan drejt Finikoundës, ku greko-britaniku hyri në kamping i maskuar.
Sipas 22-vjeçarit, pak më vonë ai dëgjoi pesë ose gjashtë të shtëna dhe britma për ndihmë, përpara se shoku i tij të dilte me nxitim nga kampingu, duke i thënë të hipte në motoçikletë.
