Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Incidente në marshimet e 1 Majit në Stamboll, policia dhunon protestuesit (VIDEO)
n.fPërditësimi i fundit 1 Maj 2025, 20:56
STAMBOLL- Në protestat e sotme në Stamboll kanë shpërthyer përleshje midis policisë dhe protestuesve. Protestat janë mbajtur në lidhje me 1 Majit, të cilat qeveria turke i ka ndaluar. Që nga mbrëmja e së mërkurës, shtatë stacione metroje dhe disa nga stacionet më të ngarkuara të autobusëve dhe tramvajit në Stamboll janë të mbyllura.
Sipas raportimeve të medias, që nga e hëna, policia ka kryer “bastisje” në disa pjesë të qytetit për të arrestuar njerëzit që bënë thirrje për tubime për 1 Majin në Sheshin Taksim. Kryeprokurori i Stambollit lëshoi urdhër-arreste për 108 persona.
Megjithatë, siç raportohet nga shoqata e avokatëve, më shumë se 400 persona që morën pjesë në festimet e 1 Majit u arrestuan sot. Autoritetet nuk dhanë menjëherë detaje. Gazetarët e AFP-së dëshmuan dhjetëra arrestime në lagjet Besiktas dhe Mecidiyeköy në anën evropiane të qytetit, ku policia bllokoi rrugët që të çonin në sheshin Taksim.
Vlen të përmendet se që nga protestat e vitit 2013, të cilat u përhapën në të gjithë Turqinë me një numër të viktimave prej tetë vetash, qeveria ka ndaluar tubimet në Taksim, madje edhe për 1 Majin, Ditën Ndërkombëtare të Gruas apo marshimet e Krenarisë.
Megjithatë, sipas mediave turke, disa protestues që sfiduan masat dhe shkuan në sheshin Taksim pavarësisht paralajmërimeve të policisë u arrestuan. Të arrestuarit u shoqëruan në stacionin e policisë për t'u marrë në pyetje. Gjatë arrestimeve, ndodhën incidente me protestuesit që rezistuan dhe policia që i rrahu ata pa të drejtë, siç shihet në videot e postuara në mediat sociale.
Siç është raportuar nga media të tjera turke, më shumë se 150 anëtarë të partive, sindikatave dhe organizatave të krahut të majtë u arrestuan pas bastisjeve në shtëpi të martën dhe të mërkurën në qytete të mëdha, si Stambolli, Ankaraja dhe Izmiri, përpara protestave të 1 Majit, sepse donin të mblidheshin në Sheshin Taksim.
Grupi Socialist për Barazi lëshoi një deklaratë në X të mërkurën duke dënuar arrestimin e një numri të madh njerëzish në bastisjet e shtëpive në shumë provinca, veçanërisht në Stamboll, pak para Ditës së 1 Majit .
