Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) raporton se gjatë vitit 2025 ka vijuar ...
BOTA
Këshilli i Evropës: Lufta në Ukrainë një kërcënim për gazetarët evropianë!
n.fPërditësimi i fundit 5 Mars 2025, 18:50
UKRAINË- Raporti vjetor i Platformës së Këshillit të Evropës për Sigurinë e Gazetarëve ka bërë me dije se lufta në Ukrainë mbetet një shqetësim madhor për sigurinë e gazetarëve, krahas kërcënimeve të tjera si survejimi dhe ngacmimi. Sipas raportit në Ukrainë, luftimet e ashpra në vijat e frontit dhe granatimet e rënda të qyteteve dhe infrastrukturës nga forcat ruse mbeten një çështje shqetësuese e madhe në Evropë për sa i përket rreziqeve dhe kostos njerëzore.
Platforma, fryt i bashkëpunimit midis Këshillit të Evropës dhe organizatave për lirinë e shtypit, dokumentoi të paktën shtatë incidente në të cilat gazetarët u shënjestruan, duke përfshirë vdekjen tragjike në fund të gushtit të Ryan Evans, një këshilltar sigurie i Reuters që u vra në një sulm me raketa në Ukrainën lindore.
Ky raport njeh gjithashtu si kërcënime serioze survejimin dhe ngacmimin në internet, shtypjen e gazetarëve përtej kufijve kombëtarë - kryesisht nga Rusia dhe Bjellorusia - dhe tendenca e disa qeverive për të përvetësuar mediat. Ai citon gjithashtu kërcënimin e dezinformimit, veçanërisht përmes përmbajtjes së krijuar nga inteligjenca artificiale.
Në vitin 2024, partnerët e Platformës, përfshirë Federatën Evropiane të Gazetarëve dhe Reporterët pa Kufij, publikuan 266 raporte incidentesh, nga të cilat 78 kishin të bënin me sulme ndaj sigurisë dhe integritetit fizik të gazetarëve.
Vendet për të cilat janë raportuar më shumë incidente përfshijnë: Ukraina (40, shumica e të cilave kishin të bënin me territoret e pushtuara nga Rusia ose që i atribuoheshin forcave ruse), Rusia (32), Turqia (28), Serbia (20) dhe Gjeorgjia (18).
Numri i incidenteve të raportuara në vendin e fundit u trefishua në krahasim me vitin e kaluar, kryesisht për shkak të sulmeve ndaj gazetarëve gjatë demonstratave pro Bashkimit Evropian. Deri më 31 dhjetor 2024, 159 gazetarë ishin në paraburgim në Evropë, nga të cilët 44 në Bjellorusi, 30 në Azerbajxhan, 29 në Rusi (përveç 28 në territoret ukrainase të pushtuara nga Rusia), 27 në Turqi dhe një në Gjeorgji.
Partnerët e Platformës i bëjnë thirrje Këshillit të Evropës, Komisionit Evropian dhe 46 vendeve anëtare të Këshillit të Evropës që të forcojnë mbrojtjen ligjore të gazetarëve, garancitë kundër dezinformimit dhe masat për të luftuar përvetësimin dhe mbikëqyrjen e medias.
