Policia e Tiranës ka filluar verifikimin e videove me përmbajtje seksuale të cilat prej ditës së djeshme po qarkullojnë në rr...
BOTA
Kim Jong-un mbi 140 kg, inteligjenca e Koresë së Jugut: Nuk ka shenja të problemeve të rënda shëndetësore
PiranjatPërditësimi i fundit 30 Shtator 2026, 15:07
Lideri i Koresë së Veriut, Kim Jong-un, konsiderohet “jashtëzakonisht obez” dhe peshon më shumë se 140 kilogramë, por aktualisht nuk ka shenja të ndonjë problemi të rëndë shëndetësor. Të dhënat janë bërë publike nga një ligjvënës i Koresë së Jugut, i cili tha se po citonte raportet e agjencisë së inteligjencës së Seulit.
Ligjvënësi Yoon Kun-young deklaroi se Kim është në një grup me rrezik të lartë për sëmundje kardiovaskulare, për shkak të peshës së tij dhe faktorëve të tjerë të njohur të stilit të jetesës. Megjithatë, sipas vlerësimeve të inteligjencës, ai nuk shfaq aktualisht probleme fizike të dukshme dhe është në gjendje të kryejë aktivitete të tilla si ngjitja e shkallëve pa vështirësi.
“Mund të supozojmë se nuk ka asnjë tregues të një problemi shëndetësor, duke pasur parasysh kujdesin e vazhdueshëm që ai merr nga ekipi i tij personal mjekësor”, tha Yoon. Gjendja shëndetësore e Kim Jong-un është prej vitesh objekt spekulimesh ndërkombëtare. Shqetësimet u shtuan veçanërisht në vitin 2020, kur lideri koreano-verior nuk u shfaq në publik për rreth 20 ditë.
Çështja shihet me vëmendje edhe për shkak të rolit të Kim si udhëheqës i një vendi me arsenal bërthamor dhe tensioneve të vazhdueshme në Gadishullin Korean. Kim Jong-un është gjithashtu duhanpirës prej vitesh dhe pesha e tij e lartë është vënë vazhdimisht në fokus. Babai i tij, Kim Jong Il, dhe gjyshi Kim Il Sung, të cilin ai e pasoi në drejtimin e vendit, ishin gjithashtu duhanpirës dhe mbipeshë. Të dy vdiqën pas problemeve kardiake.
Ndërkohë, në vitin 2019, gjatë samitit SHBA-Kore e Veriut në Hanoi, shefi i kuzhinës së Hotel Metropole, Paul Smart, tregoi disa nga preferencat ushqimore të liderit koreano-verior. Ai tha se, bazuar në informacionet që kishte marrë nga kuzhinierët personalë të Kim, udhëheqësi preferonte produkte luksoze dhe ushqime të tilla si havjari, karavidhet dhe foie gras. “Atij i pëlqen havjari, karavidhet, mallrat e vërteta luksoze. Foie gras. Ai me të vërtetë i pëlqen të argëtohet”, kishte deklaruar Smart.
