Një kallëzim i ri penal i shtohet çështjes së abuzimit me fondet e filialit të Postës Shqiptare në Durrës.
Sipas...
BOTA
"Kontribuojnë në përshkallëzimin e tensioneve”, aksioni policor në veri, Franca kritikon Kosovën
M.B.Përditësimi i fundit 22 Maj 2024, 16:00
Policia e Kosovës mbyll një institucion financiar serb në Mitrovicë të Veriut. 20 maj 2024.
KOSOVA- Ministria e Jashtme e Francës shprehu shqetësime me aksionin e fundit të kryer nga Policia e Kosovës në katër komunat në veri, duke thënë se këto “veprime të njëanshme kontribuojnë në përshkallëzimin e tensioneve”.
Më 20 maj, autoritetet e Kosovës mbyllën gjashtë objekte të Bankës Kursimore të Postës dhe Bankës Popullore të Serbisë, që operonin në katër komunat në veri, të banuara me shumicë serbe. Gjatë aksionit, që autoritetet e Kosovës thanë se kishte të bënte me vendosjen "e rendit dhe ligjshmërisë", u konfiskuan prova të ndryshme, përfshirë para.
Aksioni policor i 20 majit është kritikuar nga Shtetet e Bashkuara dhe Bashkimi Evropian. Uashingtoni tha se aksioni ishte i pakoordinuar me partnerët ndërkombëtarë, ndërkaq Brukseli e cilësoi si veprim përshkallëzues. Sipas MPJ-së franceze, veprimet e njëanshme “kërcënojnë diskutimet që po vazhdojnë” në dialogun mes Kosovës dhe Serbisë, që ndërmjetësohet nga Bashkimi Evropian, për gjetjen e një zgjidhjeje të përkohshme për njerëzit e prekur nga zbatimi i rregullores të Bankës Qendrore të Kosovës për pagesat me para të gatshme. Që nga 1 shkurti, në Kosovë ka hyrë në fuqi rregullorja e re e BQK-së, që parasheh euron valutë të vetme për kryerjen e pagesave, duke ndaluar përdorimin e dinarit serbë.
“Franca u bënë thirrje autoriteteve kosovare që të përmbahen nga çdo veprim i mëtejmë i njëanshëm. Ne inkurajojmë të dyja palët që t’i kthehen tryezës së diskutimeve dhe të punojnë për propozimin e kompromisit të paraqitur nga ndërmjetësi evropian, që është e vetmja bazë reale për të arritur një marrëveshje që lejon përfituesit të marrin transfere financiare nga Serbia”, u tha në njoftimin e Francës.
Kosova dhe Serbia janë takuar shtatë herë muajt e fundit në Bruksel, në kuadër të dialogut të ndërmjetësuar nga BE-ja, për ta gjetur një zgjidhje për dërgimin e ndihmës financiare nga Serbia për serbët e Kosovës, por nuk kanë gjetur pajtim deri tani. Komuniteti ndërkombëtar ka kërkuar pezullimin e rregullore së BQK-së, derisa komuniteti serb, i cili prej vitesh pranon pagesa të ndryshme në dinarë nga Serbia, të përshtatet me praktikën e re./ REL
