Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
BOTA
Kryebashkiaku i Stambollit me pengesa të reja për t’u bërë president, autoritetet i anulojnë diplomën
b.zPërditësimi i fundit 19 Mars 2025, 07:57
Ekrem Imamoglu
TURQI - Universiteti i Stambollit në Turqi ka anuluar diplomën e kryebashkiakut Ekrem Imamoglu, duke përmendur parregullsi me rregulloret e Këshillit të Arsimit të Lartë dhe duke kërcënuar shanset e tij për të kandiduar në zgjedhjet presidenciale të vitit 2028.
Universiteti tha të martën se 38 persona, përfshirë kryetarin e bashkisë së Stambollit, ishin transferuar në mënyrë të parregullt në programin në gjuhën angleze të Fakultetit të Menaxhimit në vitin 1990.
Ai shtoi se për 10 prej atyre me parregullsi u anulua transferimi dhe diplomat e 28 të diplomuarve, përfshirë Imamoglu, "do të tërhiqen dhe anulohen".
Imamoglu e kritikoi masën si "të paligjshme" dhe premtoi se do ta luftojë vendimin në gjykatë.
“Ata nuk kanë kompetencë për të marrë një vendim të tillë, autoriteti i takon vetëm Bordit të Drejtorëve të Fakultetit të Administrimit të Biznesit. Ditët kur ata që morën këtë vendim do të japin llogari përpara historisë dhe drejtësisë janë afër. Marshimi i kombit tonë të etur për drejtësi, ligj dhe demokraci nuk mund të ndalet", - tha Imamoglu.
Murat Emir, një ligjvënës nga Partia Popullore Republikane e Imamoglut, tha se vendimi "i dha një goditje të rëndë demokracisë sonë".
Musavat Dervisoglu, kryetari i Partisë së Mirë të opozitës, tha se anulimi ishte "përtej spastrimit të një rivali politik".
Vendimi mund të dëmtojë planet e Imamoglu për të sfiduar presidentin Rexhep Tajip Erdogan në zgjedhjet e vitit 2028 dhe erdhi disa ditë përpara se opozita pritej të zgjidhte Imamoglun si kandidatin e saj presidencial.
Sipas Kushtetutës së Turqisë, kandidatët për president duhet të kenë një diplomë të arsimit të lartë. Imamoglu, aktualisht në mandatin e tij të dytë si kryebashkiak i Stambollit, është subjekt i hetimeve dhe rasteve të shumta.
Kundërshtari i zëshëm i Erdoganit në janar kritikoi atë që ai e quajti "ngacmim" pasi la një gjykatë të Stambollit për t'u marrë në pyetje si pjesë e një hetimi të hapur mbi kritikat e tij ndaj prokurorit publik të qytetit.
Në vitin 2022, Imamoglu u dënua me dy vjet e shtatë muaj burg dhe u ndalua nga aktivitetet politike për "fyerje" të anëtarëve të Këshillit të Lartë Zgjedhor të Turqisë, një dënim që Imamoglu e ka apeluar.
Ndërkohë ditën e sotme Imamoglu është arrestuar nga policia turke me urdhër të prokurorisë. Thuhet se kjo e fundit kishte lëshuar mbi 100 urdhër arreste përfshirë këtu edhe Imamoglun, i cili sipas mediave vendase akuzohen për korrupsion, pastrim parash, zhvatje ryshfet, mashtrim, manipulim tenderash dhe ndihma e organizatës terroriste PKK/KCK.
