Forcat e armatosura të SHBA-së dhe Izraelit po planifikojnë të rifillojnë sulmet ndaj Iranit pas zgjedhjeve të mesit të man...
BOTA
Kthehet te prindërit, palestinezi në Gaza gjen vetëm duart e tyre! Bombardimet zhdukën edhe varrezat
PiranjatPërditësimi i fundit 13 Tetor 2025, 11:39
Hali Khadr kaloi dy ditë duke iu lutur prindërve të tij që të iknin me të në jug të Gazës, duke i paralajmëruar se ishte shumë e rrezikshme të qëndronin atje. Babai i tij, i njohur për kokëfortësinë, refuzoi. Debati i tyre nuk mbaroi kurrë. Një sulm ajror izraelit goditi shtëpinë e babait të tij, duke i varrosur prindërit nën rrënoja. Të dielën, dy ditë pasi u shpall armëpushimi, Khadr u kthye për të kërkuar në rrënojat e shtëpisë së prindërve të tij.
Ai e kaloi ditën duke kërkuar në beton të thyer dhe hekura të dëmtuar për ndonjë shenjë të tyre. E tëra çfarë arriti të gjente ishin disa copa të kafkave dhe pjesë të duarve.
“Babai im, shofer ambulance në pension, njihej për vullnetin e tij të fortë dhe durimin. Ai nuk e njihte frikën dhe ishte gjithmonë optimist”, tha Khadr, 40 vjeç, nga Jabaliya në Gazën veriore. Khadr i çoi eshtrat e prindërve të tij në varreza, por zbuloi se edhe ato ishin shkatërruar.
Ai vendosi t’i varroste ato pranë varreve të pakta që ishin ende të paprekura. Ashtu si Khadr, mijëra palestinezë janë kthyer në Gazën veriore që nga armëpushimi i së premtes me një detyrë të zymtë përpara tyre: kërkimin e të dashurve të vrarë javë ose muaj më parë në sulmet ajrore izraelite dhe trupat e të cilëve janë varrosur nën rrënoja. Agjencia e mbrojtjes civile e Gazës vlerëson se trupat e rreth 10,000 njerëzve janë të bllokuar nën rrënojat dhe ndërtesat e shembura. Ndërprerja e luftimeve i ka dhënë shërbimit të ambulancës mundësinë që më në fund të fillojë kërkimin për të vdekurit dhe t'u japë familjeve të tyre një shans për ta mbyllur këtë çështje.
Detyra që kanë përpara ekipet e shpëtimit është e jashtëzakonshme, duke pasur parasysh rreth 60 milionë ton rrënoja në të gjithë territorin.
