Në fjalën e saj në Kuvend Ina Zhupa ka mbajtur një qëndrim të ashpër ndaj qeverisë Rama.
Zhupa theksoi se ësht&e...
BOTA
Lavrov me Gjuriç në Moskë: Do të punojmë së bashku për të shmangur dëmin në Industrinë e Naftës së Serbisë
M.B.Përditësimi i fundit 17 Shkurt 2025, 14:36
RUSIA- Ministri i Jashtëm rus, Sergei Lavrov ka thënë të hënën se me ministrin e Jashtëm serb, Marko Gjuriç kanë arritur pajtueshmëri që të vazhdojnë punën e përbashkët për të parandaluar dëmtimin e interesave të përbashkëta që kanë në Industrinë e Naftës së Serbisë (NIS). Më 10 janar, Shtetet e Bashkuara e kanë sanksionuar NIS-in për shkak se kompania është në pronësi të kompanisë ruse Gazprom Neft, me qëllim të parandalimit të Rusisë që t’i shfrytëzojë të hyrat nga energjia për të financuar luftën në Ukrainë.
“Forca të caktuara në Perëndim nuk e duan bashkëpunimin tonë dhe po tentojnë të pengojnë bashkëpunimin tonë”, ka thënë Lavrov në konferencë të përbashkët me Gjuriqin, i cili është në një vizitë dyditore në Moskë.
Kompanitë ruse, Gazprom Neft dhe Gazprom, zotërojnë 56.15 për qind të aksioneve të NIS-it, derisa Serbia zotëron pothuajse një të tretën e aksioneve. Serbia, bashkë me Bjellorusinë, janë shtetet e vetme evropiane që nuk kanë vendosur sanksione ndaj Rusisë për luftën e nisur në Ukrainë. Ministri i Jashtëm serb, Marko Gjuriç ka thënë se bisedimet për NIS-in do të vazhdojnë dhe që presidenti serb, Aleksandar Vuçiç do të diskutojë këtë çështje edhe me zyrtarët rusë.
“Gjëja më e rëndësishme është që shtetasit serbë të mos i vuajnë sanksionet kundër NIS-it”, ka thënë ai.
Industria e Naftës e Serbisë (NIS) ka nisur kërkesë në Zyrën për Kontrollin e Aseteve të Huaja, që funksionon në kuadër të Thesarit amerikan, që të shtyjë afatin për zbatim të sanksioneve. Presidenti Vuçiç ka thënë më 6 shkurt se ai është ende në pritje të përgjigjes nga zyrtarët amerikanë, dhe që shtyrjen e sanksioneve e konsideron të nevojshme derisa të gjendet një zgjidhje lidhur me pronësinë e kompanisë. Pas takimit me Lavrovin, Gjuriç ka thënë se Serbia është në rrugën evropiane, mirëpo do t’i ruajë marrëdhëniet me Rusinë.
“Ne shpresojmë që marrëdhëniet tradicionale miqësore do të arrijnë potencialin e plotë në periudhën pasuese, dhe ne do të punojmë intensivisht me parterët rusë që të arrijmë këtë qëllim”, ka thënë Gjuriç.
Serbia varet nga Rusia sa u përket furnizimeve me gaz natyror, si dhe llogarit në mbështetjen e Moskës për të kundërshtuar pavarësinë e Kosovës në organizata ndërkombëtare. Serbia i ka përkrahur rezolutat e Kombeve të Bashkuara për integritet territorial të Ukrainës, mirëpo pavarësisht thirrjeve të Brukselit, nuk është distancuar prej Moskës zyrtare./ REL
