LDK i kthen përgjigje Kurtit, Abdixhiku propozon qeveri të tranzicionit: E kam vlerësuar të pamundur bashkëpunimin me LVV!

KOSOVË- Kryetari i Lidhjes Demokratike të Kosovës, Lumir Abdixhiku i është përgjigjur letrës së kryeministrit Albin Kurti teksa ka propozuar qeveri të tranzicionit. Ky propozim vjen pas ftesës së Kurtit, për koalicionin LVV-LDK.

Abdixhiku shprehet se e ka të pamundur bashkëpunimin me Kurtin dhe se vendi është në krize te thellë institucionale. Ai shtoi se propozon nisjen e një procesi të ri me të gjitha partitë për nisjen e një qeverie nacionale te tranzicioni.

“Kam marrë një letër nga kryetari i VV-së dhe i nxitur nga konsiderata për votuesit e VV-së, kam ndjerë nevojën që t’i përsëris qëndrimet dhe bindjet tona mbi çështjet qe janë ngritur mbi atë. LDK-ja duke parë stagnimin 4-vjeçar, e kam fjalën për aleancat e rrezikuara, rrezikimin e sigurisë nacionale… E kam vlerësuar të pamundur bashkëpunimin me z.Kurti. Por sot vendi është në krize te thellë institucionale. Dhe zgjidhjen nga kjo bllokadë LDK-ja e konsideron të domosdoshme. Propozojmë nisjen e një procesi të ri politik. Në përputhshmëri me këtë LDK-ja propozon nisjen e këtij procesi me të gjitha partitë për nisjen e një qeverie nacionale te tranzicionit”, ka deklaruar ai.

Abdixhiku tha se në zyrat e LDK-së është shqyrtuar letra dhe se fton të gjitha partitë që të jenë bashkë të ofrojnë zgjidhje. Kryetari i Lëvizjes Vetëvendosje, Albin Kurti përmes një letre i ka kërkuar kryetarit të Lidhjes Demokratike të Kosovës, Lumir Abdixhiku që të krijojnë një koalicion. Kurti më parë e ka ftuar Abdixhikun të takohen dy herë por është refuzuar në të dy rastet.

Kryeministri më tej në letër shkroi se nevojitet marrëveshje politike ndërsa shtoi se votuesit e LDK-së preferojnë më së shumti koalicionin me LVV.  Ai thekson se një takim mes tyre do të ishte më i mirë pasi duhet të flasin dhe t’i diskutojnë këto detaje si politikanë të pjekur që ndikojnë në të ardhmen dhe përparimin e vendit.