Një zë i rëndësishëm në Kongresin e Shteteve të Bashkuara të Amerikës, republikania Alexandria Ocasio Cortez ka rea...
BOTA
Letra drejtuar udhëheqësve të lartë shqiptarë dhe ndërkombëtarë, Server i përgjigjet Ali Ahmetit: Gjuha shqipe është zyrtare, marrëveshja e Ohrit është e qartë!
n.fPërditësimi i fundit 29 Tetor 2024, 16:43
Serwer
MAQEDONI E VERIUT- Ish-diplomati amerikan njëherazi edhe profesor në “Xhon Hopkins” në Uashington, Daniel Server ka reaguar së fundmi në lidhje me letrën e kreut të BDI-së, Ali Ahmeti drejtuar liderëve ndërkombëtarë. Serwer tha se ka marrë një letër nga Ahmeti ndërsa shtoi se qëllimi i tij është të gjenerojë veprime nga SHBA-ja dhe BE-ja.
Në letër Ali Ahmeti shprehet se po rrezikohen arritjet historike të shqiptarëve në Maqedoninë e Veriut. Ndërkohë Server thotë se nuk ka asnjë dilemë për gjuhën shqiper pasi është e rregulluar qartë me Marrëveshjen e Ohrit dhe kjo nuk duhet vënë në dyshim.
“Nuk kam asnjë dilemë për çështjen e gjuhës. Marrëveshja e Ohrit është e qartë për këtë temë. Ajo kërkon që çdo gjuhë e folur nga më shumë se 20% e popullsisë të jetë bashkë-zyrtare me maqedonishten. Nuk e kuptoj se si mund ta vësh në dyshim këtë detyrim pa krijuar më shumë probleme sesa Maqedonia e Veriut tashmë ka. Kjo ishte një pjesë e rëndësishme e marrëveshjes së paqes të vitit 2001. Është e rëndësishme të ruhet,” tha ish-diplomati.
Sa i përket çështjes së përkatësisë etnike në punësime, Server tha kjo ka për qëllim dominimin aktual të maqedonasve në pozitat e larta qeveritare që siç tha, ka shumë shqiptarë që janë me të përgatitur dhe më të kualifikuar se pala maqedonase, ku përmendi zotërimin e dy gjuhëve që sipas tij, kjo duhet të merret parasysh nga qeveria.
“Sigurisht, unë preferoj një sistem të verbër ndaj ngjyrave, të bazuar në merita. Por mospërcaktimi i identifikimit etnik të punonjësve të qeverisë nuk do ta bëjë punësimin e qeverisë të verbër. Emrat ju tregojnë se kush është shqiptar e kush maqedonas. Dyshoj se qëllimi i këtij propozimi është vazhdimi i dominimit aktual të maqedonasve në pozitat e larta qeveritare. Falsifikimi i verbërisë së ngjyrave nuk do të funksionojë.
Maqedonia duhet të diversifikojë të punësuarit në sektorin publik për të pasqyruar më plotësisht diversitetin e popullsisë. Unë nuk jam adhurues i kuotave. Por veprimi afirmativ me përparësi kualifikimeve është një proces që mund të prodhojë rezultate të arsyeshme. Shumë shqiptarë kanë një kualifikim që i mungon shumicës së maqedonasve: flasin të dyja gjuhët. Qeveria duhet ta marrë parasysh këtë kur punëson”, tha Server.
Çështjen e tretë, që është përfaqësimi i drejtë ne qeveri dhe në lidhje me ankesën e OBRM-PDUKM-së se maqedonasve u janë marrë pozitat, Server e quan më shumë ankesë politike sesa ligjore apo kushtetuese. Server nuk e mohon se, fituesit e zgjedhjeve u përpoqën të dobësojnë praninë e shqiptarëve në pozitat udhëheqëse.
“Çështja e tretë e përfaqësimit të drejtë nuk është specifikuar plotësisht. Unë supozoj se i referohet pozitave që u janë dhënë shqiptarëve etnikë në qeverinë aktuale. Kjo është më shumë një ankesë politike sesa ligjore apo kushtetuese. Një nga ankesat kryesore maqedonase ndaj qeverisë së mëparshme ishte mbizotërimi i shqiptarëve në pozitat kyçe.
Fituesit e zgjedhjeve të fundit u përpoqën të dobësonin praninë shqiptare sepse fituan zgjedhjet. Rivalët shqiptarë të BDI-së negociuan marrëveshjen aktuale të koalicionit. Nëse e kanë bërë keq, kjo është çështje për zgjedhjet e ardhshme. Diplomatët amerikanë dhe evropianë mund t’ia tregojnë këtë kryeministrit, por në fakt nuk është një çështje ndërkombëtare”, deklaroi Server.
