Kryeministri Edi Rama ka publikuar një pasqyrë të protestave në disa vende, ku përfshihet edhe Shqipëria, duke krahasuar numrin e ...
BOTA
Lufta e armatosur e Partisë së Punëtorëve të Kurdistanit/ Erdogan: Përfundimi i luftës është vetëm çështje kohe! Një epokë e re do të fillojë për të gjithë ne
m.lPërditësimi i fundit 9 Maj 2025, 15:34
TURQI- Është vetëm çështje kohe, thotë Rexhep Tajip Erdogan, që Partia e Punëtorëve të Kurdistanit (PKK) të dorëzojë armët, ndërsa agjencia kurde e lajmeve Firat News Agency (ANF) raporton se në kongresin e partisë u morën vendime historike pas një thirrjeje nga udhëheqësi i saj i burgosur Abdullah Oçalan për shpërbërjen e saj.
Partia e Punëtorëve të Kurdistanit (PKK) do të dorëzojë armët dhe do të shpërbëhet "sot ose nesër", tha të enjten presidenti turk, Recep Tayyip Erdogan.
"Ne i kemi kapërcyer të gjitha pengesat. Sot ose nesër, PKK-ja do të lëshojë armët dhe do ta shpërbëjë organizatën. Pas kësaj, një proces i ri, një epokë e re do të fillojë për të gjithë ne”, u tha Erdogan ministrave dhe deputetëve të Partisë për Drejtësi dhe Zhvillim (AKP) në pushtet në një fjalim në selinë e partisë.
Agjencia e lajmeve Firat raportoi se PKK-ja mbajti kongresin e saj më 5-7 maj në Irakun verior, ku ndodhet tani grupi i jashtëligjshëm. Por deklarata e PKK-së e lëshuar nuk tha nëse rebelët kishin vendosur të shpërbëheshin apo të çarmatoseshin.
"Kongresi i 12-të i PKK-së mori vendime me rëndësi historike në lidhje me aktivitetet e PKK-së, bazuar në thirrjen e Apo-së", raportoi Firat, duke iu referuar udhëheqësit të PKK-së, Abdullah Oçalan, i cili është burgosur në Turqi për 26 vjet.
Oçalan, i cili po vuan dënimin me burgim të përjetshëm, lëshoi një deklaratë më 27 shkurt duke bërë thirrje që PKK-ja të çarmatoset dhe të shpërbëhet. PKK-ja është përcaktuar si grup terrorist nga Turqia dhe aleatët e saj perëndimorë.
PKK-ja shpalli armëpushim në mars pas thirrjes së Oçalanit për çarmatim, dhe njoftimi i kongresit të saj pritej nga Partia pro-kurde DEM, e treta më e madhe në parlamentin e Turqisë. Organizata ka qenë kryengritëse kundër shtetit turk që nga viti 1984, duke u përqendruar kryesisht në juglindje të vendit. Më herët këtë javë, zëdhënësi i partisë AKP të Erdoganit, Omer Celik, tha se eliminimi i tensioneve përmes shpërbërjes dhe çarmatimit të PKK-së do të forconte demokracinë turke.
"Çdo hap konkret i ndërmarrë për t'i dhënë fund terrorizmit, për ta çmontuar atë dhe për të bërë që organizata terroriste të dorëzojë armët, do të sjellë reagime dhe hapa të rinj pozitivë. Është jashtëzakonisht e rëndësishme që organizata terroriste të njoftojë vendimin e saj për t'u shpërbërë dhe për të dorëzuar armët sa më shpejt të jetë e mundur", shtoi Celik.
