Një vatër zjarri është regjistruar pasditen e kësaj të diele pranë fshatit Humelicë në Gjirokastër.
Sipas i...
BOTA
Mbledhja sot në Gjenevë, Trump: Do të përfshihem indirekt në bisedimet bërthamore me Iranin
PiranjatPërditësimi i fundit 17 Shkurt 2026, 08:01
Presidenti i Shteteve të Bashkuara, Donald Trump, ka deklaruar se do të jetë i përfshirë “indirekt” në raundin e ri të bisedimeve mes Iranit dhe SHBA-së, që pritet të nisë në Gjenevë më vonë gjatë së martës.
Duke folur për gazetarët në bordin e avionit presidencial Air Force One, Trump u shpreh se beson që Irani është i interesuar të arrijë një marrëveshje lidhur me programin e tij bërthamor.
Raundi i dytë i bisedimeve në Zvicër zhvillohet në një klimë tensionesh të larta, pas kërcënimeve të përsëritura ushtarake kundër Iranit, si dhe për shkak të shtypjes vdekjeprurëse të protestave antiqeveritare dhe mosmarrëveshjeve të vazhdueshme mbi aktivitetet bërthamore të Teheranit.
Të hënën, Ministria e Jashtme në Teheran deklaroi se qëndrimi i SHBA-së për çështjen bërthamore ishte zhvendosur drejt një pozicioni “më realist”.
Sipas palës iraniane, takimi i së martës – i ndërmjetësuar nga Omani – do të fokusohet në programin bërthamor të Iranit dhe në heqjen e mundshme të sanksioneve ekonomike të vendosura nga Uashingtoni. Megjithatë, SHBA ka lënë të kuptohet se dëshiron të diskutojë edhe çështje të tjera, përfshirë rezervat e raketave të Iranit.
Duke i cilësuar bisedimet si “shumë të rëndësishme”, Trump sugjeroi se këtë herë Teherani është më i motivuar për të negociuar.
“Nuk mendoj se ata duan pasojat e mosarritjes së një marrëveshjeje,” tha ai, duke shtuar se Irani i ka mësuar pasojat e një qëndrimi të ashpër gjatë bisedimeve verën e kaluar, kur SHBA-të përdorën bombarduesit stealth Northrop Grumman B-2 Spirit për të goditur objektiva bërthamore iraniane.
“Mund të kishim arritur një marrëveshje në vend që të dërgonim B-2 për të eliminuar potencialin e tyre bërthamor. Dhe na u desh të dërgonim B-2,” tha Trump. “Shpresoj se do të jenë më të arsyeshëm.”
Këto deklarata vijnë në një kohë kur SHBA ka rritur praninë ushtarake në Lindjen e Mesme. Sipas verifikimeve me imazhe satelitore nga BBC Verify, aeroplanmbajtësja amerikane USS Abraham Lincoln është vendosur pranë brigjeve të Iranit.
