Një shpërthim me lëndë të dyshuar plasëse është regjistruar në orët e para të mëngjesit të so...
BOTA
Ndikimi i tarifave tek bizneset amerikane
n.fPërditësimi i fundit 6 Mars 2025, 19:23
SHBA- Presidenti amerikan Donald Trump vendosi tarifa prej 25% ndaj Kanadasë dhe Meksikës, si dhe 10% tarifa të reja ndaj Kinës, duke e rritur totalin në 20%. Për të parë se si kjo do të ndikojë tek bizneset e vogla, korrespondentja e Zërit të Amerikës, Carolyn Presutti vizitoi një biznes familjar për prodhimin e uiskit në Virxhinia.
Në kompaninë e distilimit ‘Catoctin Creek’ fillon procesi i prodhimit. Thekra lëshon aromën e bukës së pjekur. Becky dhe Scott Harris prodhojnë uiski nga thekra. Pijet nga thekra prodhoheshin në Virxhinia njëqind vjet përpara tarifave të para për vendet e tjera, që u vendosën nga presidenti i parë i vendit, George Washington.
Tashmë, tarifat nën drejtimin e presidentit aktual po vështirësojnë përpjekjet e kësaj kompanie për të shitur uiski thekre jashtë vendit.
“Kjo i bën eksportet shumë më të vështira, apo jo? Sepse kushdo që blen produktet e mia duhet të paguajë tarifën dhe kjo është diçka që blerësit nuk do ta bëjnë”, thotë Becky Harris.
Jo vetëm që ndikohet shpërndarja në Meksikë dhe Kanada, por edhe lëndët e para – si shishet e qelqit, megjithëse janë prodhuar në Amerikë.
Prodhuesit e mëdhenj zakonisht i blejnë shishet nga Meksika dhe Kina, por pas zgjedhjeve në Shtetet e Bashkuara, ata kaluan tek kompanitë amerikane.
“Shishet e prodhuara në Amerikë, mund të jenë të mjaftueshme edhe për dy muajt e ardhshëm, por më pas duhet t’i porosisim nga importi me një çmim më të lartë në mënyrë që të mbajmë produktin në qarkullim”, thotë Becky Harris.
Planet për shtrirjen e biznesit në Meksikë dhe Kanada u lanë mënjanë, ndërsa pronarët kanadezë të dyqaneve po heqin nga raftet uiskin e thekrës dhe pijet e tjera të prodhuara në Amerikë.
"Ishim në procesin e marrjes së një porosie nga Franca dhe distributori francez na tha se, ‘Jo, thjesht nuk është një kohë e mirë tani që produktet amerikane të shkojnë atje’," thotë Scott Harris.
Presidenti Donald Trump thotë se vendosja e tarifave do t’i motivojë udhëheqësit botërorë të ndalin fluksin e emigrantëve të paligjshëm dhe drogës.
“Kemi nevojë që Meksika dhe Kanadaja të bëjnë shumë më tepër se sa kanë bërë, dhe ata duhet të ndalin rrjedhën e fentanilit dhe drogës drejt Shteteve të Bashkuara. Duhet ta ndalin”, tha Presidenti Trump.
Mbështetësit e presidentit i mirëkuptojnë tarifat.
“Tarifat, mendoj, janë të nevojshme për të patur ndikim. Dhe për t'i bërë gjërat të drejta kur bëhet fjalë që ne të blejmë artikuj nga vende të tjera, vende që blejnë nga ne”, thotë votuesi Michael Bernacki, mbështetës i Presidentit Trump.
Çmimet e aksioneve në bursën Wall Street ranë për dy ditë me radhë.
"Shpresa duhet të jetë që rënia e tregut të aksioneve do të bëjë që administrata të tërhiqet nga kjo politikë tregtare, sepse lufta tregtare është vërtet një humbje për të dyja palët", thotë Desmond Lachman, nga Instituti Amerikan i Sipërmarrjes.
Por deri atëherë, zoti Lachman thotë se cikli i tarifave dhe kundër-tarifave do të vazhdojë – pa u ndalur./ VOA
