Protesta qytetare është shtrirë në disa qytete të vendit, përfshirë Korçën, ku qytetarë janë mbledhur...
BOTA
"Në rrezik siguria dhe stabiliteti i rajonit"/ Irani bombardon uzinën më të madhe të gazit në botë
PiranjatPërditësimi i fundit 18 Mars 2026, 20:28
Një sulm me raketa ka goditur qytetin industrial Ras Laffan në Katar, ku ndodhet një nga qendrat më të mëdha të përpunimit të naftës dhe objekti më i madh në botë për prodhimin e gazit të lëngshëm (LNG).
Sipas kompanisë shtetërore QatarEnergy, sulmi ka shkaktuar dëme të konsiderueshme materiale dhe zjarre në zonë. Autoritetet bënë të ditur se ekipet e emergjencës ndërhynë menjëherë për të vënë situatën nën kontroll.
“I gjithë personeli është në rregull dhe deri më tani nuk raportohet për viktima”, thuhet në deklaratën e kompanisë.
Edhe Ministria e Brendshme e Katarit konfirmoi se zjarret janë vënë nën kontroll paraprak dhe se nuk ka persona të lënduar.
Ndërkohë, autoritetet në Doha e cilësuan sulmin si një kërcënim serioz për sigurinë kombëtare dhe stabilitetin rajonal, duke përdorur tone të ashpra ndaj Iran.
“Sulmet me raketa përbëjnë një kërcënim të drejtpërdrejtë për sigurinë tonë dhe stabilitetin e rajonit”, thuhet në reagimin zyrtar.
Ministria e Jashtme paralajmëroi gjithashtu për përshkallëzim të situatës, duke theksuar se Katari “rezervon të drejtën për t’u përgjigjur” dhe nuk do të hezitojë të marrë masa për të mbrojtur sovranitetin dhe qytetarët e tij.
Ky incident pritet të rrisë tensionet në Gjirin Persik dhe të ndikojë në tregjet globale të energjisë.
