Raportuesi i Partisë Popullore Evropiane (PPE) për Shqipërinë, Andrey Kovatchev, ka reaguar për protestat e studentëve në Tir...
BOTA
Nga falja e protestuesve kundër abortit te kriptomonedhat, çfarë urdhrash ekzekutivë nënshkroi së fundmi presidenti Donald Trump
r.llPërditësimi i fundit 23 Janar 2025, 22:56
donald trump
SHBA- Presidenti amerikan Donald Trump ka nënshkruar një sërë urdhrash të rinj ekzekutivë në Zyrën Ovale gjatë orës së fundit. Me urdhrat ekzekutivë të nënshkruar, Trump fali 23 protestues kundër abortit dhe firmosi njohjen Federale të Fisit Lumbee të Karolinës së Veriut. Gjithashtu presidenti nënshkroi edhe një urdhër për Inteligjencën Artificiale dhe një tjetër për kriptomonedhën.
"Mund të mos ju duken emocionuese, por ne do të bëjmë shumë para për vendin," thotë ai pas nënshkrimit të urdhrit të kriptove, i cili do të krijonte një grup pune të fokusuar në bërjen e SHBA-së "kryeqytetin kripto" të botës.
Pak minuta më parë firmosi edhe urdhrin për deklasifikimin e dokumenteve që lidhen me tre nga atentatet më të rëndësishme në historinë e SHBA-së, vrasjet e John F Kennedy, Robert F Kennedy dhe Martin Luther King Jr. Ky është një nga njoftimet parazgjedhore të Trump që e zbatoi duke firmosur një urdhër ekzekutiv në kuadër të një “stuhie” urdhrash ekzekutivë në ditët e para të mandatit të tij.
“Shumë njerëz e presin këtë, për shumë kohë, për dekada të tëra. Gjithçka do të zbulohet” tha Trump. Presidenti kërkoi që stilolapsi që përdori për të nënshkruar urdhrin t'i jepej Robert F Kennedy Jr, i cili është i propozuari i Trump për postin e Sekretarit të Shëndetësisë.
Më herët një gjykatës amerikan bllokoi përkohësisht urdhrin ekzekutiv të Trump që i jep fund dhënies së nënshtetësisë për fëmijët që lindin në SHBA. Gjykatësi John Coughenour, i emëruar nga Ronald Reagan e quajti urdhrin ekzekutiv antikushtetues. Gjykatësi pranoi kërkesën e Prokurorit të Përgjithshëm të Uashingtonit, Nick Brown dhe tre shteteve të tjera të udhëhequra nga demokratët, që ndalonte zbatimin e vendimit për të paktën 14 ditët e ardhshme.
Pak orë pasi bëri betimin më 20 janar, presidenti i Shteteve të Bashkuara, Donald Trump, nënshkroi një mori urdhrash ekzekutivë për të përmbushur premtimet e tij të fushatës. Mes tyre ishte edhe urdhri që ndalon nënshtetësinë automatike për ata që lindin në Shtetet e Bashkuara. I quajtur “Mbrojtja e kuptimit dhe vlerës së shtetësisë amerikane”, urdhri ekzekutiv i Trumpit kundërshton shtetësinë për foshnjat e lindura në SHBA nga prindër që nuk janë as shtetas e as banorë të përhershëm të ligjshëm.
Urdhri ekzekutiv, i cili hyn në fuqi pas 30 ditësh, përkatësisht më 19 shkurt, mund të prekë dhjetëra mijëra fëmijë që lindin çdo vit në SHBA nga prindër që nuk kanë status ligjor, përfshirë fëmijët e njerëzve që u është siguruar azili, por nuk janë ende banorë të përhershëm, si dhe ata të shtetasve të huaj që u është dhënë leja afatgjate e punës, H-1B.
