Një aksident rrugor është regjistruar paraditen e kësaj të enjte (4 qershor 2026) në Tiranë, pranë Fabrikës s&eum...
BOTA
Plani i paqes nga Biden/ Analiza: Hamasi nuk do ta mbështesë pa zotimin e Izraelit për armëpushim të përhershëm
b.zPërditësimi i fundit 5 Qershor 2024, 16:17
Pamje nga rrënojat
IZRAEL - Grupi militant palestinez Hamas njoftoi se nuk do ta mbështesë planin paqësor pa një qëndrim të qartë të Izraelit rreth armëpushimit të përhershëm dhe tërheqjes nga Gaza. Sipas korrespondentes së Zërit të Amerikës në Shtëpinë e Bardhë, Patsy Widakuswara, vendimi i Hamasit vjen pas zotimit të udhëheqësve izraelitë për të vazhduar operacionet ushtarake deri në shkatërrimin e Hamasit, përkundër propozimit për armëpushim që presidenti amerikan Joe Biden e bëri publik javën e kaluar.
Ndërkohë që Izraeli po vazhdon operacionin ushtarak në Gazë, përpjekjet për të siguruar armëpushim po hasin në pengesa. Katari, që po ndërmjetëson në emër të Hamasit, tha se ka mungesë qartësie nga dy palët që po luftojnë njëra-tjetrën. Zëdhënësi i Ministrisë së Jashtme të Katarit, Majed Al-Ansari tha se në rrethanat aktuale ka pak shpresë.
“Po shohim deklarata kontradiktore nga ministrat e kabinetit qeveritar izraelit. Deklaratat e dy palëve nuk na japin shumë shpresë për procesin", thotë ai.
Udhëheqësit izraelitë u zotuan t’i vazhdojnë operacionet ushtarake kundër Hamasit deri në shkatërrimin e tij, përkundër propozimit për armëpushim të paraqitur nga Presidenti amerikan Joe Biden javën e kaluar. Në një intervistë zoti Biden duket se u pajtua me pretendimet se Kryeministri izraelit Benjamin Netanyahu po zvarrit luftën për të joshur bazën e tij të përkrahësve të krahut të djathtë, por kur u pyet to martën nëse kryeministri izraelit po e bën këtë gjë për arsye politike, Presidenti Biden e hodhi poshtë këtë pohim.
“Nuk besoj. Ai po mundohet ta zgjidhë këtë problem serioz,” deklaroi Presideni Biden.
Plani për armëpushim fillon me një pezullim të përkohshëm gjashtë javësh të luftimeve në këmbim të lirimit të disa pengjeve që mbahen nga Hamasi dhe qëllimi i tij është të lëvizë drejt një armëpushimi të përhershëm.
Si garantues i Izraelit në negociata, Shtetet e Bashkuara thonë se presin që dyja palët të paraqesin kërkesa shtesë, por kanë besim se Izraeli do t’i përmbahet detyrimeve të veta që dalin nga marrëveshja.
Zëdhënësi i Shtëpisë së Bardhë për Sigurinë Kombëtare, John Kirby i tha Zërit të Amerikës se Shtetet e Bashkuara presin që Izraeli t’i përmbahet propozimit.
“Presim që Izraeli të vazhdojë ta mbështesë propozimin sepse bëhet fjalë për propozimin e tyre. Dhe është në interesin e Izraelit. Edhe të Hamasit. Ata thonë se duan që lufta të marrë fund. Kjo është rruga për t’i dhënë fund kësaj lufte”, thotë ai.
Ndërkohë që palestinezët vazhdojnë të përballen çdo ditë me shkatërrim dhe vdekje, jo të gjithë kanë pikëpamjet optimiste të administratës amerikane, përfshirë një ish negociator amerikan për Lindjen e Mesme.
“Parashikimi im është që edhe nëse të dyja palët e pranojnë këtë propozim – që ende mbetet çështje e hapur, duke patur parasysh dimensionin politik, posaçërisht në Izrael – duhet shumë fat për ta përmbushur fazën e parë të propozimit. Por përtej kësaj faze, nuk shoh mundësi për përparim”, i tha Zërit të Amerikës zoti Aaron David Miller nga Fondacioni Carnegie për Paqe Ndërkombëtare.
Presidenti Biden ka siguruar përkrahje nga bashkësia ndërkombëtare, përfshirë edhe për një rezolutë të Këshillit të Sigurimit që mbështet propozimin për armëpushim.
Rezoluta e Shteteve të Bashkuara nuk përfshin kërkesën parashtruar Izraelit për t’u dhënë fund operacioneve në Rafah, që është pjesë e një rezolute tjetër të Këshillit të Sigurimit, e propozuar nga Algjeria.
“Shumica e anëtarëve të Këshillit të Sigurimit duan ndalimin e menjehershëm të operacionit në Rafah. Por nëse Shtetet e Bashkuara arrijnë t’i bindin anëtarët e tjerë të Këshillit të Sigurimit se propozimi i tyre është rrugë e qëndrueshme drejt armëpushimit, përfshirë armëpushimin në Rafah, atëherë besoj që anëtarët e tjerë të këshillit do të bëjnë kompromis,” thotë eksperti Richard Gowan nga Grupi Ndërkombëtar i Krizave.
Por përderisa numri i viktimave civile vazhdon të rritet, gjasat për arritjen e një marrëveshjeje armëpushimi tani për tani duken të zbehta./VOA
