Një aksident rrugor është regjistruar paraditen e kësaj të enjte (4 qershor 2026) në Tiranë, pranë Fabrikës s&eum...
BOTA
"Qytetarët duhet të marrin tre masa paraprake..."/ Kryeministri i Spanjës: Përdorni telefonat me përgjegjësi, telekomunikacioni është në një moment kritik!
E.DPërditësimi i fundit 28 Prill 2025, 18:50
SPANJË- Kryeministri i Spanjës, Pedro Sánchez, ka bërë thirrje për përdorim të përgjegjshëm të telefonave, duke theksuar se sektori i telekomunikacionit po kalon një moment kritik. Sanchez gjatë një deklarate theksoi se ende nuk ka informacion përfundimtar mbi shkaqet e ndërprerjes së energjisë që ka prekur pjesë të ndryshme të vendit.
Por u siguroi qytetarëve se për momentin nuk ka kërcënim për sigurinë publike. Kryeministri theksoi se sistemet e pagesave dhe bankingu dixhital po funksionojnë normalisht, duke qetësuar shqetësimet për ndikimin e mundshëm në jetën e përditshme. Sánchez njoftoi gjithashtu se Këshilli Kombëtar i Sigurisë do të zhvillojë një tjetër mbledhje brenda ditës për të shqyrtuar masat që mund të merren në vazhdim.
"Ende sot, shkaqet janë duke u studiuar. Është më mirë të mos spekulojmë," tha Sanchez.
Gjithashtu Kryeministri tha se nuk përjashtohet asnjë hipotezë, por nuk pranoi të komentojë zërat e përhapur për një sulm të mundshëm kibernetik. Ai shtoi se publiku duhet të marrë tre masa paraprake kryesore në orët e ardhshme: të reduktojë udhëtimet në minimumin e nevojshëm, të ndjekë vetëm komunikimet zyrtare dhe të përdorë celularët me përgjegjësi.
Me këtë ai shpjegoi se njerëzit duhet të bëjnë thirrje të shkurtra dhe shërbime të urgjencës telefonike përmes 112 vetëm kur është rreptësisht e nevojshme.
"Ne do të kalojmë disa orë kritike derisa të rikthehet energjia elektrike. Ne duhet t'i mbajmë telefonatat të shkurtra dhe t'i përdorim rrjetet me përgjegjësi," tha ai, duke paralajmëruar se rrjetet telefonike mund të mbingarkohen ndërsa njerëzit përpiqen të kontaktojnë me të dashurit.
