Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
BOTA
Rikthehet sëmundja vdekjeprurëse, shënohet viktima e parë pas gati një dekade
PiranjatPërditësimi i fundit 28 Maj 2026, 10:40
Australia ka regjistruar vdekjen e parë nga Difteria pas gati një dekade, ndërsa vendi po përballet me shpërthimin më të rëndë të kësaj sëmundjeje të parandalueshme me vaksinë në dekada.
Në mars, Territori Verior (NT) shpalli gjendje shpërthimi të difterisë, ndërsa raste janë raportuar edhe në Australinë Perëndimore, Australinë Jugore dhe Queensland. Rastet nisën të rriteshin në fund të vitit 2025, me një rritje të fortë gjatë shkurtit.
Këtë vit janë regjistruar 245 raste, duke shënuar shpërthimin më të madh në Australi që nga viti 1991, kryesisht në komunitetet indigjene të izoluara.
Të martën, ministri i Shëndetësisë i Territorit Verior tha se rezultatet e autopsisë nga një laborator jashtë vendit konfirmuan se difteria ishte shkaku i vdekjes së një burri në prill në spitalin Royal Darwin Hospital. Kjo është vdekja e parë e tillë që nga viti 2018.
Në javët e fundit, qeveria ka intensifikuar fushatën e vaksinimit në zonat më të rrezikuara dhe numri i rasteve të reja tashmë po bie, thanë zyrtarët shëndetësorë.
“Qeveria jonë e ka marrë këtë situatë shumë seriozisht dhe po punojmë fort për të kuptuar shkaqet dhe për të frenuar përhapjen,” deklaroi ministri i Shëndetësisë së NT-së, Steve Edgington.
Sipas tij, që nga 30 marsi janë kryer 10,407 vaksinime.
Nga janari i vitit të kaluar deri në maj të këtij viti, Territori Verior raportoi 163 raste difterie, prej të cilave 48 raste respiratore dhe 115 raste kutane, të cilat përhapen përmes kontaktit me lëkurën.
Në mars, autoritetet shëndetësore në Australinë Perëndimore konfirmuan dy raste të difterisë respiratore, hera e parë në më shumë se 50 vjet që shteti regjistron raste të tilla.
Rreth 60% e rasteve këtë vit janë në Territorin Verior, ndërsa rreth 36% në Australinë Perëndimore. Disa raste janë raportuar edhe në Australinë Jugore dhe më pak në Queensland.
Autoritetet po u bëjnë thirrje komuniteteve të prekura të përditësojnë vaksinat, sidomos adoleshentëve dhe të rriturve që kanë nevojë për doza përforcuese.
Zyrtarët e shëndetësisë në NT kanë hapur klinika të përkohshme në Darwin, Katherine dhe Alice Springs për të rritur ndërgjegjësimin mbi vaksinimin, duke theksuar se vaksinat janë “masa më e rëndësishme për parandalimin, mbrojtjen dhe uljen e transmetimit.”
Të dy format e difterisë — respiratore dhe kutane — mund të parandalohen përmes vaksinimit, i cili zakonisht jepet te fëmijët në pesë doza nga mosha dy muajshe deri në katër vjeç, me një dozë përforcuese mes moshës 12 dhe 13 vjeç.
Difteria respiratore zakonisht nis me temperaturë ose të dridhura, dhimbje fyti dhe mund të çojë në vështirësi në frymëmarrje dhe gëlltitje, duke u bërë kërcënuese për jetën.
Difteria kutane zakonisht shkakton plagë ose ulçera të infektuara në pjesët e ekspozuara të trupit, të cilat shërohen ngadalë, por rrallë çojnë në sëmundje të rëndë.
Sipas transmetuesit kombëtar ABC, vdekja e fundit nga difteria ishte raportuar në vitin 2018. Javën e kaluar, zyrtari kryesor mjekësor i Australisë, Prof. Michael Kidd, e shpalli difterinë një incident kombëtar me rëndësi të veçantë për shëndetin publik.
Qeveria australiane njoftoi gjithashtu një paketë prej 7.2 milionë dollarësh australianë për të forcuar vaksinimin dhe burimet në zonat e prekura./Përktheu Piranjat News
