Pak orë para protestës së paralajmëruar, Policia ka rrethuar me barriera metalike perimetrin pranë Parlamentit, nga Xhamia e Namazgja...
BOTA
Shpërthimi i Tesla Cybertruck para hotelit të Trump/ Shoferi ishte një ushtar aktiv i forcave speciale, autoritetet: Qëlloi veten
ZH.LLPërditësimi i fundit 3 Janar 2025, 08:37
Tesla
LAS VEGAS- Autori që drejtoi një Tesla Cybertruck që shpërtheu jashtë hotelit Trump në Las Vegas ishte një ushtar aktiv i forcave speciale amerikane dhe qëlloi veten para shpërthimit, thanë zyrtarët.
Policia e Las Vegas ka identifikuar Matthew Alan Livelsberger, 37 vjeç, nga Kolorado Springs, Kolorado, si shoferin e automjetit, të cilin e mori me qira më shumë se 800 milje larg dhe e çoi në hotelin e Nevadës në mëngjesin e shpërthimit.
Shkaku i vdekjes së Livelsberger ishte vetëvrasja nga një plagë e vetëshkaktuar me armë zjarri, sipas zyrës së mjekëve të kontesë Clark. Shtatë persona u plagosën kur automjeti i mbushur me bombola karburanti dhe mortaja fishekzjarre shpërtheu në ditën e Vitit të Ri. Zyrtarët thanë se të gjitha plagët ishin të lehta.
Livelsberger udhëtoi me Cybertruck në qytet të mërkurën në mëngjes, më pak se dy orë para shpërthimit, tha policia. I parkuar para hotelit pranë një hyrje xhami, automjeti filloi të tymonte, më pas shpërtheu.
Autoritetet e Las Vegas thanë se Cybertruck ndihmoi në frenimin e shpërthimit, duke e dërguar atë vertikalisht dhe jo jashtë. Dyert dhe dritaret e xhamit pranë hotelit nuk u thyen nga shpërthimi. Autoritetet thanë se ende nuk kanë përcaktuar ndonjë motiv pas incidentit.
Sherifi tha se hetuesit gjetën një letërnjoftim ushtarak, një pasaportë, dy pistoleta gjysmë automatike, fishekzjarre, një iPhone, një orë inteligjente dhe disa karta krediti në emrin e Livelsberger nga automjeti i djegur. Trupi në automjet u dogj dhe u gjet me një plagë të vetëshkaktuar me armë zjarri në kokë, tha të enjten sherifi i Las Vegas Kevin McMahill.
McMahill tha se ata gjetën dy tatuazhe në mbetjet e shoferit që përputheshin me ato që kishte Livelsberger. Banori i Kolorados Springs mori me qira Cybertruck më 28 dhjetor në Denver.
Policia ishte në gjendje të gjurmonte lëvizjet e tij duke përdorur një numër fotografish gjatë udhëtimit nga Denveri, Kolorado në Las Vegas, Nevada, së bashku me teknologjinë e karikimit të Teslës që ndihmoi në hartimin e vendit ku ai ndaloi përgjatë rrugës. Ai ishte i vetmi që u pa duke drejtuar mjetin.
Sipas policisë, dyshohet se ky incident në Las Vegas dhe një sulm me kamion në Neë Orleand që la pas 14 viktima mund të kenë lidhje me njëri-tjetrin, teksa që të dy ndodhën në ditën e Vitit të Ri. Të dy të dyshuarit shërbenin në Fort Bragg në Karolinën e Veriut, megjithëse nuk ka asnjë të dhënë se ata shërbenin në të njëjtën njësi ose ishin atje në të njëjtën kohë. Ata gjithashtu shërbyen në Afganistan në vitin 2009, por nuk ka asnjë provë se ishin në të njëjtin rajon apo njësi. Gjithashtu, të dy përdorën kompaninë Turo për të marrë me qira automjetet e përfshira në incidente.
Livelsberger kishte dekada përvojë me ushtrinë amerikane, pasi kishte shërbyer si në Ushtri ashtu edhe në Gardën Kombëtare. Ai ishte një rreshter i dekoruar i Inteligjencës së Forcave Speciale. Ai ishte duke shërbyer në Gjermani, por me leje të miratuar në momentin e incidentit.
Babai i Livelsberger i tha partnerit të lajmeve të BBC-së CBS se djali i tij ishte në Kolorado për të parë gruan dhe vajzën tetë muajshe. Ai tha se foli për herë të fundit me djalin e tij në Krishtlindje dhe se gjithçka dukej normale./ BBC
