Deputetja e PD, Jorida Tabaku, ka kritikuar qeverinë për mungesën e përgatitjes së bizneseve shqiptare për përballjen me st...
BOTA
Tre të vdekur nga ethet e Nilit/ Konfirmohen 35 raste të reja në Maqedoninë e Veriut, 6 në gjendje kritike
PiranjatPërditësimi i fundit 17 Gusht 2026, 23:37
Ka shkuar në tre numri i viktimave nga ethet e Nilit Perëndimor në Maqedoninë e Veriut.
Viktima e fundit është një 61-vjeçar, ndërsa në vend janë konfirmuar 35 raste të infektimit, gjashtë prej të cilëve në gjendje kritike. Ministri maqedonas i Shëndetësisë, Sasho Klekovski, tha se ka nisur spërkatja kundër mushkonjave në disa zona, ndërsa të tjera do t’i nënshtrohen këtij procesi në ditët në vijim.
Sipas tij, në Shkup do të spërkaten 17 mijë hektarë nga ajri dhe 5 mijë hektarë me spërkatje tokësore. Ai shtoi se janë planifikuar ndërhyrje edhe në ujërat e ndenjura, përfshirë pellgjet në park dhe liqenin në Stajkovcë.
Drejtori i Klinikës për Sëmundje Infektive, Fadil Cana, bëri të ditur se gjashtë pacientë po trajtohen në Njësinë e Kujdesit Intensiv, ndërsa 16 të tjerë janë të shtruar në Klinikë. Sipas tij, pacienti më i ri është 25 vjeç dhe ndodhet në gjendje të qëndrueshme.
Ethet e Nilit Perëndimor transmetohen përmes pickimit të mushkonjave të infektuara. Rreziku për forma të rënda të sëmundjes është më i lartë te të moshuarit, personat me imunitet të dobët dhe ata që vuajnë nga sëmundje kronike.
Ndërkohë, Athina mbetet një nga zonat më të prekura në Evropë nga ethet e Nilit Perëndimor. Në Greqi janë regjistruar deri tani 81 raste të sëmundjes dhe nëntë viktima.
