Forcat e armatosura të SHBA-së dhe Izraelit po planifikojnë të rifillojnë sulmet ndaj Iranit pas zgjedhjeve të mesit të man...
BOTA
U rrëmbye teksa luante në park, mbesa gjen pas shtatë dekadash xhaxhain e humbur përmes testit të ADN-së në internet
S.BPërditësimi i fundit 23 Shtator 2024, 11:26
SHBA- Një burrë i cili u rrëmbye në moshën gjashtë-vjeçare ndërsa luante në një park në Kaliforni në vitin 1951, është gjetur më shumë se shtatë dekada më vonë falë ndihmës së një testi të prejardhjes në internet, fotove të vjetra dhe copëzave të gazetave. Bay Area News Group raportoi të premten se mbesa e Luis Armando Albino në Oakland – me ndihmën e policisë, FBI-së dhe departamentit të drejtësisë – gjeti xhaxhain e saj që jetonte në bregun lindor të SHBA.
Albino, baba dhe gjysh, është një zjarrfikës në pension dhe veteran i Trupave Detare që shërbeu në Vietnam, sipas mbesës së tij, 63-vjeçares Alida Alequin. Ajo gjeti Albinon dhe e ribashkoi me familjen e tij në Kaliforni në qershor.
Më 21 shkurt 1951, një grua e joshi Albino-n gjashtë-vjeçar nga parku në West Oakland, ku ai kishte qenë duke luajtur me vëllain e tij më të madh, dhe i premtoi në spanjisht se do t'i blinte karamele. Në vend të kësaj, gruaja rrëmbeu djalin e lindur në Porto Riko, duke e fluturuar në bregun lindor, ku ai përfundoi me një çift që e rriti atë sikur të ishte djali i tyre, raportoi grupi i lajmeve.
Për më shumë se 70 vjet, Albino mbeti i zhdukur, por ai ishte gjithmonë në zemrat e familjes së tij dhe fotografia e tij varej në shtëpitë e të afërmve. Nëna e tij vdiq në vitin 2005, por kurrë nuk i hoqi shpresat se djali i saj ishte gjallë.
Në një intervistë për grupin e lajmeve, mbesa tha se xhaxhai i saj “më përqafoi dhe më tha ‘Faleminderit që më gjete’ dhe më puthi në faqe”.
Artikujt e Oakland Tribune të asaj kohe raportuan se policia, ushtarët nga një bazë ushtarake lokale, rojet bregdetare dhe punonjës të tjerë të qytetit iu bashkuan një kërkimi të madh për djalin e zhdukur. Ideja e parë që xhaxhai i saj mund të ishte ende gjallë erdhi në vitin 2020 kur, "vetëm për argëtim" Alequin bëri një test të ADN-së në internet. Testi tregoi një përputhje prej 22% me një burrë që përfundimisht doli të ishte xhaxhai i saj.
Më 24 qershor, me ndihmën e FBI-së, Luis erdhi në Oakland me anëtarët e familjes së tij dhe u takua me Alequin, nënën e saj dhe të afërm të tjerë.
