U shpall fajtore për përvetësim të fondeve të BE-së/ Marine Le Pen do të apelojë dënimin, avokati: Kjo është një goditje për demokracinë

]

marine le pen

FRANCË- Udhëheqësja e së djathtës ekstreme franceze, Marine Le Pen do të apelojë dënimin kundër saj, njoftoi avokati i saj Rodolfo Beauselou. Marine Le Pen u shpall fajtore sot për keqpërdorim të fondeve publike nga një gjykatë e Parisit dhe u dënua me privim të së drejtës për të kandiduar në zgjedhje për pesë vjet.

"Kjo është një goditje për demokracinë," u tha ai gazetarëve jashtë selisë së partisë së ekstremit të djathtë Rally National në Paris.

Marine Le Pen, u shpall fajtore për shpërdorim të fondeve evropiane, me qëllim financimin e partisë së saj të ekstremit të djathtë, Tubimi Kombëtar. Gjykata i ndaloi të mbajë poste publike për pesë vjet, çfarë do të thotë se ajo nuk do të mund të garojë në zgjedhjet presidenciale të Francës, më 2027.

Gjykata ia shqiptoi edhe dënimin me katër vjet burgim, dy prej të cilëve do të pezullohen. Dy të tjerët, ndërkaq, do t'i kalojë me etiketë elektronike dhe jo në paraburgim. Ajo, gjithashtu, u dënua me 100.000 euro gjobë. 

Le Pen, së bashku me më shumë se 20 figura të tjera partiake, u akuzuan për punësimin e asistentëve që punonin për partinë e saj dhe jo për Parlamentin Evropian, që i paguante. Gjatë gjyqit vitin e kaluar, ajo mohoi se kishte kryer “parregullsinë më të vogël”. Për zgjedhjet e vitit 2027, ajo tha se do të ishin përpjekja e saj e katërt dhe e fundit për të marrë kryesimin e Presidencës franceze.

marine le pen