Gjatë orëve të pasdites dhe mbrëmjes zona e Gjirokastrës është përfshirë nga moti i keq me reshje intensive dhe s...
BOTA
Vala e të nxehtit godet Belgjikën, temperaturat e larta thyejnë rekordin gjysmë shekullor
PiranjatPërditësimi i fundit 25 Qershor 2026, 18:03
Belgjika përjetoi sot ditën më të nxehtë të regjistruar ndonjëherë për këtë periudhë të vitit, ndërsa meteorologët paralajmërojnë se temperaturat do të vazhdojnë të rriten në ditët në vijim.
Një stacion meteorologjik në Bruksel regjistroi 34.6 gradë Celsius gjatë pasdites, duke thyer një rekord të nxehtësisë që kishte qëndruar i pathyer për më shumë se pesë dekada.
Sipas mediave belge, kërkesa e lartë për ventilatorë dhe kondicionerë ka zbrazur raftet e shumë dyqaneve, ndërsa qytetarët po përpiqen të përballojnë valën e pazakontë të të nxehtit.
Parashikimet meteorologjike tregojnë se temperaturat mund të arrijnë deri në 40 gradë Celsius në disa zona të vendit, duke rritur shqetësimet për ndikimin e motit ekstrem në shëndetin publik dhe infrastrukturë.
Shërbimi Kombëtar Meteorologjik i Belgjikës ka lëshuar një alarm të kuq, nivelin më të lartë të paralajmërimit, për dy provinca lindore të vendit për ditën e premte, për shkak të nxehtësisë ekstreme.
Belgjika është një nga vendet e Evropës Perëndimore që po përballet me një valë të fortë të nxehti, me temperatura të pazakonta për muajin qershor.
Meteorologët paralajmërojnë se kushtet e motit mund të mbeten të rrezikshme edhe gjatë fundjavës, duke u bërë thirrje qytetarëve të shmangin ekspozimin e gjatë në diell dhe të marrin masat e nevojshme për t’u mbrojtur nga temperaturat e larta.
