Deputeti i Partisë Demokratike, Bardh Spahia deklaroi sot se Operatori i Shërbimeve të Integruara në Shëndetësi e miratuar pak d...
BOTA
Vdes “krimineli më i vogël” me moshën më të vjetër në qeli/ I shpëtoi ekzekutimit tetë herë gjatë 70 viteve
PiranjatPërditësimi i fundit 19 Gusht 2026, 18:22
Francis Clifford Smith vdiq më 25 qershor 2019, në moshën 101 vjeç. Jeta e të burgosurit amerikan mund të kishte qenë shumë më e shkurtër nëse ekzekutimi i tij nuk do të ishte shtyrë tetë herë.
Ai ishte një kriminel i vogël me një precedent penal që datonte që nga mosha 13-vjeçare. Në vitin 1950, kur ishte 25 vjeç, ai u dënua për vrasjen e një roje nate. Smith ishte arrestuar së bashku me një tjetër person, i cili dëshmoi kundër tij dhe, në këmbim, mori një dënim më të lehtë.
Smith e shpalli gjithmonë pafajësinë e tij, veçanërisht pasi dëshmitarët tërhoqën deklaratat e tyre fillestare dhe një person tjetër pranoi se kishte kryer vrasjen e rojes së natës. Në fakt, është shumë e mundur që Smith të mos ketë qenë fare i pranishëm në momentin e vrasjes.
Për shkak të dyshimeve, ekzekutimi i Smithit u shty çdo herë, deri në vitin 1954, kur dënimi i tij u ndryshua në burgim të përjetshëm.
Por, pavarësisht të gjitha këtyre, Smith kaloi rreth 70 vjet në burg, shkruan BBC. Ai konsiderohet i burgosuri që kaloi më shumë vite në burg se çdo person tjetër në Shtetet e Bashkuara.
Ai u lirua përkohësisht nga burgu vetëm tri herë. Në vitin 1967, ai u arratis për 12 ditë përpara se të kapej sërish. Në vitin 1974, ai e kaloi natën e Krishtlindjes në shtëpi, përpara se të kthehej në burg po atë ditë. Ndërsa në vitin 1975, u lirua me kusht, por u arrestua përsëri brenda 10 muajsh për posedim arme.
Ndërsa ishte i burgosur në burgun Osborne në Connecticut, ai ushqente zogjtë. “Ai fshihte sa më shumë bukë që mundte në rrobat e tij dhe të gjithë bënin sikur nuk e shihnin, sepse e dinin se buka ishte për zogjtë”, treguan njerëz që e njihnin.
Gjatë viteve të tij në burg, Smith refuzoi shumë oferta për lirim me kusht, deri në vitin 2020, kur, në moshën 95-vjeçare, u lirua dhe u vendos nën mbikëqyrje në një azil për të moshuar.
Të burgosurit e moshuar nuk janë vetëm një fenomen amerikan, megjithëse në SHBA, për shkak të numrit të madh të të burgosurve në raport me popullsinë, ky fenomen është më i theksuar se në vendet e tjera.
Hulumtimet kanë treguar se, nga viti 1991 deri në vitin 2021, numri i të burgosurve mbi 55 vjeç është pesëfishuar. Gjithashtu, vlerësohet se deri në vitin 2030, një e treta e të burgosurve do të jenë mbi 50 vjeç.
Për këtë problem social në rritje, ekspertët rekomandojnë lirimin e personave për arsye shëndetësore ose për shkak të moshës së thyer, veçanërisht të atyre që, për shkak të gjendjes së tyre të rënduar shëndetësore, nuk mund ta përballojnë më jetën e vështirë në burg.
Nga ana tjetër, megjithatë, ka pak struktura që pranojnë ish-të burgosur të moshuar, duke e bërë edhe më të vështirë rikthimin e tyre në shoqëri. /PiranjatNews/
