Pas kontrolleve nga SPAK, biznesmeni izraelit, Ron Yeffet, po përballet me telashe edhe në Shtetet e Bashkuara të Amerikës.
Përplasj...
BOTA
Videot erotike që kanë tronditur politikën e Malit të Zi, reagon "protagonistja" e skandalit
PiranjatPërditësimi i fundit 29 Janar 2026, 17:55
Mirjana Pajkoviq, ish-sekretare e Drejtorisë për Përmirësimin dhe Mbrojtjen e të Drejtave të Njeriut në Mal të Zi, ka folur publikisht për kërcënimet dhe shantazhet që pretendon se ka përjetuar nga Dejan Vukshiq, ish-drejtor i Agjencisë për Sigurinë Kombëtare (ANB).
Në një intervistë për televizionin online të portalit Dan, Pajkoviq deklaroi se institucionet shtetërore kanë dështuar të reagojnë në mënyrë adekuate ndaj denoncimeve të saj, pavarësisht kërcënimeve serioze që, sipas saj, kanë zgjatur për një periudhë të gjatë kohore dhe nuk kanë çuar në arrestime apo masa konkrete. Ajo kritikoi edhe mungesën e reagimit nga nivelet më të larta të shtetit, duke theksuar se, sipas saj, “edhe presidenti i shtetit ka dështuar të veprojë” përballë ankesave të paraqitura.
Ish-zyrtarja u shpreh se rasti i saj dëshmon se ligji nuk zbatohet njësoj për të gjithë dhe se në Mal të Zi vazhdon të mungojë barazia gjinore dhe mbrojtja efektive e të drejtave themelore. Në këtë kontekst, Pajkoviq u bëri thirrje grave që të mos heshtin përballë dhunës apo abuzimit, duke e cilësuar heshtjen e saj fillestare si një gabim. Sipas deklarimeve të saj, Vukshiq e ka kërcënuar vazhdimisht se ajo “nuk do të kishte jetë në Mal të Zi”, duke e shantazhuar me materiale komprometuese, pasi ajo kishte refuzuar të vepronte sipas kërkesave të tij.
Pajkoviq ka paraqitur disa kallëzime penale ndaj Vukshiqit dhe, si juriste, vlerëson se kuadri ligjor aktual nuk është i mjaftueshëm për të adresuar krime të tilla si shantazhi dhe kërcënimet, të cilat, sipas saj, kanë pasoja të rënda personale dhe profesionale. Rasti i saj është pjesë e një afere që prej më shumë se një muaji ka tronditur skenën politike dhe institucionale në Mal të Zi. Në qendër të saj janë Dejan Vukshiq dhe Mirjana Pajkoviq, të cilët dhanë dorëheqjen nga funksionet shtetërore pas publikimit në rrjetet sociale të materialeve intime që, sipas Pajkoviq, janë shpërndarë pa pëlqimin e saj.
Ajo ka paraqitur tre kallëzime penale, duke akuzuar Vukshiqin për kërcënime dhe shantazh me publikimin e këtyre materialeve.
