Protestuesit kanë njoftuar se do të mblidhen sot në orën 9:00 para Parlamentit. Tubimit të studentëve u janë bashkuar edhe ...
BOTA
Zelenskyy këmbëngul në propozimin për armëpushim 30-ditor në Ukrainë
n.fPërditësimi i fundit 8 Maj 2025, 08:01
UKRAINË- Presidenti ukrainas, Volodymyr Zelenskyy tha të mërkurën se këmbëngul në propozimin për armëpushim 30-ditor në luftën me Rusinë, një propozim të cilit Kremlini nuk i është përgjigjur. Më parë, zëdhënësja e Ministrisë së Jashtme ruse hodhi poshtë komentet e të dërguarit të posaçëm të Shtëpisë së Bardhë, Keith Kellogg, se Moska po pengonte përpjekjet për të arritur një armëpushim.
Këto deklarata u bënë disa orë para se të hynte në fuqi në mesnatë një armëpushim tre-ditor i shpallur nga Presidenti rus Vladimir Putin për të shënuar 80-vjetorin e fitores së Bashkimit Sovjetik dhe aleatëve të tij mbi Gjermaninë naziste dhe fundin e Luftës së Dytë Botërore në Evropë.
“Propozimi i Ukrainës për ndërprerjen e sulmeve dhe një armëpushim për të paktën 30 ditë mbetet i vlefshëm”, tha Zelensky në një videomesazh. "Ne nuk po e tërheqim këtë propozim, i cili mund t'i japë një shans diplomacisë", shtoi ai.
Duke komentuar sulmet e shumta me dronë në Rusi, Zelenskyy tha se është absolutisht e drejtë që qielli rus, qielli i vendit agresor, nuk është i qetë si një pasqyrë e asaj që po ndodh në Ukrainë. Rusia, tha presidenti ukrainas, nuk i është përgjigjur propozimit për një armëpushim 30-ditor, por vetëm po nis “sulme të reja”. Kjo u tregon shumë qartë të gjithëve se nga vjen lufta.
Propozimi për një armëpushim 30-ditor u bë nga SHBA-të në mars dhe Ukraina e pranoi atë. Rusia deklaroi se propozimi mund të zbatohej vetëm pasi të arrihej një marrëveshje mbi mekanizmat që do të ishin përgjegjës për zbatimin dhe respektimin e armëpushimit.
Duke pohuar se Rusia ka respektuar armëpushimin e Pashkëve dhe moratoriumin 30-ditor për sulmet ndaj infrastrukturës energjetike, zëdhënësja e Ministrisë së Jashtme ruse, Maria Zakharova, theksoi se pengesa e vetme për armëpushimin është Kievi, i cili shkel marrëveshjet dhe nuk është i gatshëm të diskutojë seriozisht kushtet e një armëpushimi afatgjatë.
