Filmi i ardhshëm i Christopher Nolan, 'Odisea' bën histori si filmi i parë komercial i xhiruar me kamer kinemaje IMAX

SHBA- Filmi i ardhshëm i Christopher Nolan, "Odisea", do të bëjë histori si filmi i parë komercial i xhiruar tërësisht me kamera kinemaje IMAX. Regjisori i filmave “Oppenheimer”, “Inception” dhe “Dunkirk” po ecën përpara me prodhimin e tij më ambicioz filmik deri më tani, duke sjellë në ekran epikën klasike të Homerit me nënshkrimin e kinemasë së madhe inovative. Filmi pritet të dalë premierë më 17 korrik 2026.

Pas suksesit global të filmit "Oppenheimer" në kinematë IMAX, i cili i kaloi 190 milionë dollarët, regjisori i famshëm Christopher Nolan thuhet se i ka lëshuar një sfidë të guximshme drejtorit të IMAX, Rich Gelfond. Filmi fitues i çmimit Oscar, "Oppenheimer", mban rekordin si prodhimi filmik që iu afrua më shumë xhirimit 100% me kamera IMAX, siç raportohet nga World of Reel.

"Një vit para se Chris të fillonte xhirimet e "Odyssey", ai më telefonoi dhe më tha se donte të bënte një film të xhiruar me kamera IMAX ", tha Gelfond në drekën vjetore të kompanisë në Festivalin e Filmit në Kanë.

"Kjo nuk mund të bëhej për shumë arsye. Megjithatë, Nolan më tha: Do të të jap një sfidë. Nëse gjeni një mënyrë për të zgjidhur problemet, unë do ta xhiroj 'Odisenë' 100% në IMAX," dhe ne i zgjidhëm ato. Dhe kështu, "Odisea" do të jetë filmi i parë i xhiruar tërësisht me kamera IMAX. Na detyroi të rimendonim këtë aspekt të punës sonë, të pajisjeve tona të xhirimit, të kamerave tona filmike. Jam i lumtur që ai na dha këtë mundësi," shtoi Gelfond.

Rezultati i IMAX janë kamera 30% më të qeta dhe dukshëm më të lehta, me sisteme të përmirësuara të skanimit dhe përpunimit të filmave që lejojnë përpunimin pothuajse të menjëhershëm të pamjeve të ditës. Me fjalë të tjera, i vjen fundi pritjes që dikush ta shohë materialin dhe ndoshta i vjen fundi dialogëve pa zë.