Një shpërthim me lëndë të dyshuar plasëse është regjistruar në orët e para të mëngjesit të so...
INVESTIGIME
Bashkia e Devollit harxhon 180 milionë lekë për një ujësjellës që nuk 'ekziston'.
PiranjatPërditësimi i fundit 31 Mars 2023, 22:38
Janë shpenzuar rreth 180 milionë lekë në Devoll për ujësjellësin e Mirasit, por ujësjellësi nuk duket gjëkundi.
“Piranjat” kanë bërë një investigim për të treguar se si qëndron e vërteta dhe ku kanë përfunduar 180 mln lekët e destinuara për ujësjellësin.
Jemi kthyer edhe njëherë në bashkinë Devoll. Sepse mesa duket problemet ne qytetin juglindor nuk paskan fund. Kësaj radhe bëhet fjalë për ujësjellësin e fshatit Miras, një investim i bërë në bashkëpunim me shoqërinë Autovision Al. Por le t’i marrim gjërat në mënyrë kronologjike. Në 16.04.2019 bashkia Devoll, asokohe me kryetar Bledjon Nallbatin, lidh akt-marrëveshjen e financimit me shoqërinë “Autovision al”, me objekt “Ndërtimin e rrjetit të jashtëm për furnizimin e ujësjellësit të fshatit Miras nga burimi i valës së Sinicës.
Sipas kësaj akt-marrëveshje, shoqëria konçensionare, që po ndërtonte në territorin e Bashkisë Devoll HEC Qytezë, do të financonte materialet e ndërtimit dhe karburantin, prej 3612 litra naftë, që do të përdornin mjetet për ndërtimin e ujësjellësit.
Pas nënshkrimit të marrëveshjes, shoqëria brenda 14 ditësh do të sillte mostrat e materialeve për miratim nga specialistët e Ujësjellësit dhe brenda një jave do të siguronte furnizimin, duke i dorëzuar materialet pranë Ujësjellës Kanalizime Devoll sha.
Ndërsa kompania zvarrit nisjen e punimeve, në qershor të 2019, kryetar i Bashkisë bëhet zoti Eduard Duro. Kryetar i ri, rregulla të reja. Për arsye të panjohura, për kontratën me kompaninë Autovision Al, nuk flitet më, ndërkohë që muajt kalojnë dhe bëhen vite. Për kontratën që do të kryente punimet e ujësjellësit të Mirasit, kujtohet më në fund Kontrolli i Lartë i Shtetit, raporti i të cilit konstaton se nga ana e shoqërisë nuk janë respektuar afatet e përcaktuara në marrëveshje për dorëzimin e materialeve, dhe nga të dhënat e magazinës së Ujësjellës-Kanalizime Devoll, në 25,04, 2019 janë dorëzuar mostrat e materialeve dhe në 06, 06, 2019, 2500 ml tuba ujësjellësi, kur në fakt në preventiv sasia shënon 5.020 ml tuba.
KLSH ka konstatuar gjithashtu se nga të dhënat e magazinës nuk ka sasi tjetër materiali të dorëzuar, pra akt-marrëveshja nuk është zbatuar e plotë.
Kanë kaluar katër vite dhe Ujësjellësi ende nuk ka përfunduar. Bashkia nuk ka folur asnjëherë për këtë çështje dhe natyrshëm as kompania, e cila kishte detyrimin për të kryer punimet. Këtu ka diçka që nuk shkon, por më mirë se askush, mund ta sqarojë kryetari i bashkisë, zoti Duro.
Le ta pyesim njëherë kryetarin se përse janë zvarritur punimet e ujësjellësit dhe cila është arsyeja që shoqeria Autovision Al, nuk e ka zbatuar këtë akt marrëveshje?
‘Piranja’ shkojnë tek bashkia dhe merr kryetarin në telefon i cili i thotë bëj kërkesë me shkrim dhe lëre aty.
Meqë nuk kryetari nuk donte të na takonte, vendosëm ta presim jashtë ambienteve të bashkisë.
Siç e patë edhe ju në VIDEO, kryetari nuk dha asnjë përgjigje. Sepse, siç e thotë edhe populli: Heshtja flet më shumë se fjalët.
A do t’i përgjigjet kryetari pyetjes, çfarë fundi pati investimi 180 milionë lekë?
