Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
INVESTIGIME
Miliona euro shpenzime për ‘zbukurimin’ e ushtarëve/ ‘Çmendet’ Ministria e Mbrojtjes
PiranjatPërditësimi i fundit 6 Dhjetor 2024, 21:42
Dy vjet më parë Ministria e Mbrojtjes mori një nismë, e cila synoi të krijojë një paketë sociale për ushtarakët, duke ofruar një karrierë dinjitoze për ata që shërbejnë pranë Forcave të Armatosura. Trajtimet lidheshin jo vetëm me dietat ushqimore, paketën e strehimit dhe rritjen e pagave, por edhe me mbulimin e shërbimeve shëndetësore dhe dentare.
Vitin e shkuar Ministria e Mbrojtjes investoi në dy laboratorë, atë klinik- biokimik dhe bakterologjik për analizat e sëmundjeve të ndryshme dhe rikonstruksionin e kabinetit dentar. Për të gjitha këto u shpenzuan 110 mijë euro dhe 750 mijë të tjera për blerjen e pajisjeve për laboratorët, pra 860 mijë euro në total. Gjithë këto shpenzime, në një kohë që në Shqipëri ka spitale publike, që kanë laboratorë, e që po ashtu janë paguar me taksat e qytetarëve dhe blejnë çdo vit reagentë për analiza mjekësore.
Por sikur të mos mjaftonin këto, këtë vit do të shpenzohen plot 4.2 milion euro për të blerë kite dhe reagentë për të kryer analizat mjekësore, dhe një pjesë e fondit do të shkojë për të blerë materiale për kujdesin dentar të ushtarakëve. Shumë mund të thonin se nisma është mjaft e mirë për t’i shërbyer një personeli, i cili vë në rrezik jetën për të mbrojtur vendin, por e gjithë kjo politikë e trajtimit shëndetësor të ushtarakëve nxjerr zbuluar një tjetër legjendë që ka 10 vjet që flitet në Shqipëri: Shëndetësinë Falas.
Po nëse shëndetësia është falas, atëherë përse duhet të blihen sërish materiale për laboratorë, kite dhe reagentë për analiza dhe madje të paguajmë edhe për analizat rutinë, të cilat mbulohen për moshën mbi 35 vjeç nga skema e kontrollit shëndetësor të Check up?! Një pjesë e mirë e ushtarakëve e plotësojnë kriterin e moshës mbi 35 vjeç, çka automatikisht ata do të përfitonin 42 teste, ku kryesoret janë analizat biokimike, gjaku, urina dhe gjaku okult, shërbime që i ofron një kompani koncesionare, e cila paguhet nga shteti shqiptar 18.3 euro për një analizë. Nëse paketa mjekësore e analizave të koncesionit të Check-up i kushton shtetit shqiptar 18.3 euro për person, për analizat e ushtarëve që do të kenë nevojë për to, shkon 231 euro, afërsisht 12 herë më shumë.
Por nuk mbaron këtu. Ushtarakët do të përfitojnë edhe shërbime nga klinika dentare. Pasi investoi në rikonstruksionin e kabintetit dentar, i cili gjithashtu do të ofrojë shërbimin e mirëmbajtjes së dhëmbëve falas, Ministria e Mbrojtjes shpalli tenderin për të blerë materiale dentare, me një fond limit me vlerë 446 mijë euro.
Fituese u përzgjodh Moto Mania, që dha ofertën më të ulët, 183 mijë euro.
Kompania është themeluar në vitin 2013 dhe si objekt të saj ka patur “tregtim mjetesh transporti”, por disa vite më vonë Moto Mania vendosi të shtojë në aktvitetitn e saj edhe tregtimin e materialeve dhe paisjeve dentare, duke fituar kështu disa procedura për furnizimin me medikamente në spitalet rajonale.
Një truk i mirë, që kompania të tregojë kapacitet financiar, kusht që vendoset në procedurat e prokurimit. Për këtë ka bashkuar në të njëjtin nipt me aktivitetin për shitjen e makinave dhe bicikletave, edhe atë të shërbimeve dentare. Epo në fund të fundit, qëllimi u arrit. Një firmë me bilanc modest në veprimtarinë e furnizimit me materiale dentare, arriti të fitojë kontratën për të suportuar me medikamente të fushës së stomatologjisë të gjithë ushtrinë për plot dy vjet.
Lidhur me këto shpenzime të paarsyeshme, Ministri i Mbrojtjes, Pirro Vengu nuk dha asnjë përgjigje.
Nuk na mbetet gjë tjetër, veçse të shpresojmë që tenderi të bëhet vërtet për të mbështetur ushtarakët dhe jo për të djegur fondet me kompani, që ose nuk kanë eksperiencë ose kanë përvojë modeste.
