Reperi i njohur kosovar, Capital T, u ka bërë thirrje mediave në Kosovë që tu kushtojnë më shumë vëmendje zhvillime...
INVESTIGIME
Nga investimet në bursa si “Firmat piramidale” tek shpërndarja e materialeve intime, afrikanët me adresa vajzash shqiptare zhvasin djemtë përmes shantazhit
b.zPërditësimi i fundit 31 Maj 2024, 21:54
Foto ilustruese
TIRANË - Në vitet kur industria e basteve sportive ishte në kulmin e saj, “fixed match“ ishte mënyra më e përhapur e mashtrimit online, ku ti paguan në këmbim të rezultatit të saktë të një ndeshje futbolli, e më pas shpenzon të tjera para duke vënë baste që supozohej të ishin të sakta. Një tjetër mënyrë e përhapur e mashtrimit online janë ende dhe sot, email-et apo mesazhet false në rrjete sociale, ku viktimës i kërkohen të dhëna të sakta personale dhe bankare, me pretendimin se është fitues i një shorteu të madh milona dollarësh. Një stil i ngjashëm, është edhe ai i kushëririt milioner të vdekur nga kanceri, i cili papritur të kishtë lënë të gjithë pasurinë, por ti duhej që më përpara të dërgoje një shumë të vogël prej 200 ose 300 dollarësh. Një lloj komisioni fare i papërfillshëm përballë milionave që do të të vinin nga kushëriri i ndjerë. Por tashmë, këto forma janë bërë paksa të dala mode, dhe mashtruesit kërkojnë të gjejnë rrugë të reja.
Ndihmën e “Piranjave” pasi kishte rënë në rrjetën e mashtruesve e kërkoi një i ri i cili mendonte se po komunikonte me një vajzë nga Shqipëria, por shpejt kuptoi se personi me të cilin po komunikonte ishte i huaj dhe materialet intime që kishte dërguar, iu përdorën kundër, me premtimin se do të fshihen vetëm nëse paguan mijëra euro.
Po kush janë personat që fshihen pas këtyre profileve?
Persona me kombësi të huaj të cilët vjedhin adresa të përdoruesve vajza nga Shqipëria ose u marrin vetëm emrin dhe fotot duke krijuar adresa të reja. Bindin bashkëbiseduesin që të komunikojnë, u kërkojnë materiale intime e më pas i shantazhojnë duke i kërkuar para. Këta persona kuptohen lehtësisht që s’janë shqiptarë edhe nga gjuha e përdorur, e cila nuk është një shqipe native, por e përkthyer me google translate.
Një formë tjetër e mashtrimeve është edhe ajo e “trading online”, ose investimi në bursë që më shumë i ngjan një firme piramidale. Moneytrade2024 është një prej faqeve në Instagram e cila i kërkon ndjekësve të saj të investojnë me premtimin se do të marrin më shumë para mbrapsh, por ato para nuk merren kurrë. Është një faqe që në dukje aspak serioze, me vetëm një postim dhe me asnjë shpjegim për mënyrën se si mund të investosh. Personi që administron faqen prezantohet si Gentrit Shala dhe adresa që u jep personave të cilët bien pre e mashtrimit është në Zvicër. Mënyrat e investimit janë dërgesa e parave përmes RIA ose moneygram, ndaj bëni kujdes!
