Në fillim të viteve ’90, Shqipëria kishte një pasuri që nuk ishte krijuar nga ekonomia, por ishte trashëguar nga natyra, me ...
KOSOVA
Aleanca ushtarake Kroaci-Kosovë-Shqipëri, flet ministri kroat: S’është kërcënim!
PiranjatPërditësimi i fundit 12 Shkurt 2026, 23:14
Ministri i Mbrojtjes i Kroacisë, Ivan Anushiq, ka deklaruar sot në Bruksel se bashkëpunimi ushtarak mes Kroacisë, Kosovës dhe Shqipërisë nuk përbën kërcënim për askënd dhe se synimi kryesor është stabiliteti i rajonit.
“Shqipëria është anëtare e NATO-s dhe kandidate për BE, Kosova synon anëtarësimin në BE dhe NATO, Kroacia është anëtare e BE-së dhe NATO-s, dhe për këtë arsye interesat tona janë të përbashkëta. Ne kemi interes stabilitetin e këtij rajoni të Evropës, e jo destabilizimin”, tha Anushiq për agjencinë e lajmeve “Beta”.
Ministri kroat kujtoi se Kroacia ka një marrëveshje bashkëpunimi në fushën e mbrojtjes edhe me Serbinë, të nënshkruar në vitin 2010, e cila mbulon nëntë fusha të bashkëpunimit dhe që vazhdon të jetë në fuqi.
“Kroacia dëshiron t’i ndihmojë Shqipërisë dhe Kosovës në rrugën e tyre drejt anëtarësimit në BE dhe NATO, ashtu siç jemi të gatshëm ta bëjmë edhe për Serbinë, nëse vendos të ndjekë rrugën evropiane apo atë të NATO-s”, theksoi Anushiq, i cili mori pjesë në takimin e ministrave të mbrojtjes të NATO-s në Bruksel.
Ai shtoi se brenda NATO-s dhe BE-së ekzistojnë dhjetëra marrëveshje dhe deklarata të bashkëpunimit, të cilat kanë për qëllim shkëmbimin e njohurive, teknologjive dhe lidhjen e industrive të mbrojtjes.
“Nuk kemi qenë kurrë kërcënim për askënd, veçanërisht jo Kroacia, dhe as nuk e planifikojmë të jemi. Anëtarësimi ynë në NATO dhe BE na obligon dhe ne as mundemi, as duam të veprojmë ndryshe”, shtoi ministri kroat.
Shefat e Shtabeve të Mbrojtjes të Kroacisë, Kosovës dhe Shqipërisë, në një takim të zhvilluar të mërkurën në Shkodër, diskutuan mbi sfidat e sigurisë, thellimin e bashkëpunimit ushtarak, rritjen e ndërveprueshmërisë dhe forcimin e kapaciteteve mbrojtëse.
Pas këtij takimi u njoftua se gjatë këtij viti do të zhvillohet ushtrimi i parë i përbashkët trepalësh, në kuadër të deklaratës së bashkëpunimit në fushën e mbrojtjes të arritur vitin e kaluar.
Ndërkohë, Ministria e Mbrojtjes e Serbisë e dënoi ashpër këtë takim, duke pretenduar se veprime të tilla mund të shkaktojnë pasoja të gjata për sigurinë dhe të destabilizojnë situatën në Ballkanin Perëndimor.
