Ministria e Mbrojtjes ka njoftuar se nga 25 vatrat e zjarrit të raportuara gjatë 24 orëve të fundit, 9 prej tyre mbeten ende aktive. P&eum...
KOSOVA
Gjuajtja me vezë ndaj Kurtit/ Haxhiu zbulon informacionet: Kishte plane për veprime të tjera
PiranjatPërditësimi i fundit 10 Gusht 2026, 16:21
Ushtruesja e detyrës së presidentes së Kosovës, Albulena Haxhiu, ka deklaruar se tensionet e fundit në Kuvend mund të përshkallëzoheshin edhe më tej. Ajo tha sot se institucionet kishin informacione për veprime të tjera përtej incidentit të gjuajtjes me vezë ndaj kryeministrit në detyrë, Albin Kurti.
Haxhiu ka bërë thirrje për uljen e tensioneve dhe arritjen e një marrëveshjeje politike përpara vazhdimit të seancës konstituive të legjislaturës së 11-të, duke theksuar se zgjidhja e ngërçit institucional duhet të kalojë përmes dialogut mes partive.
“Përgjegjësinë për thirrjen e seancës konstituive e ka kryesuesi i seancës konstituive. Para pak kohësh ka pasur një qëndrim të tij për shkak të zhvillimeve të fundit, tensioneve dhe përshkallëzimeve brenda Kuvendit të Republikës. Atë ditë, në seancë, e ka vlerësuar se duhet t’i jepet përparësi marrëveshjeve politike”, deklaroi Haxhiu.
Ajo tha se nevoja për një marrëveshje politike është në përputhje edhe me qëndrimet e Gjykatës Kushtetuese për çështjet që lidhen me konstituimin e institucioneve.
Por Haxhiu zbuloi se situata në Kuvend mund të kishte marrë përmasa edhe më serioze.
“Ne kemi parë një pjesë atë ditë, por keni parasysh se, nga informacionet që i kemi pasur, ka pasur plane edhe për veprime të tjera. Prandaj, nuk na duhen situata tensionuese, përshkallëzimet, konfliktet fizike apo të tjera si këto”, tha ajo.
Sipas ushtrueses së detyrës së presidentes, partitë politike duhet të shfrytëzojnë periudhën në dispozicion për t’u ulur në tryezën e dialogut dhe për të gjetur një zgjidhje që do të shmangte një tjetër bllokadë institucionale.
Haxhiu kërkoi që palët të mos refuzojnë takimet dhe që çdo marrëveshje të respektojë rezultatin e zgjedhjeve dhe peshën politike që qytetarët u kanë dhënë subjekteve politike.
