Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
KOSOVA
"Kurti do të bëhet sërish kryeministër"/ Konjufca: Sot do të kemi Kuvend të konstituuar
PiranjatPërditësimi i fundit 10 Tetor 2025, 10:11
Deputeti i Lëvizjes Vetëvendosje, Glauk Konjufca, ka deklaruar se Kuvendi i Kosovës do të konstituohet gjatë ditës së sotme, duke i hapur rrugë krijimit të institucioneve të reja pas zgjedhjeve të përgjithshme të mbajtura tetë muaj më parë.
“Së shpejti do ta kemi Albin Kurtin kryeministër për herë të tretë. Prej nesër fillon rrjedhja e kohës për formimin e Qeverisë sepse sot do të kemi Kuvend të konstituuar”, u shpreh Konjufca para nisjes së seancës plenare.
I pyetur nëse janë zhvilluar negociata me ndonjë parti opozitare për përmbylljen e konstituimit, Konjufca konfirmoi se “negociatat gjithmonë ndodhin, bisedimet gjithmonë ndodhin”, pa dhënë më shumë detaje mbi përmbajtjen apo rezultatin e tyre.
Megjithatë, Vetëvendosje ka rikonfirmuar qëndrimin e saj se nuk do të votojë asnjë kandidat të propozuar nga Lista Serbe për postin e nënkryetarit të Kuvendit. Lista Serbe, si partia më e madhe që përfaqëson komunitetin serb në Kosovë, ka kontestuar më herët procesin e konstituimit për shkak të mospërfshirjes së përfaqësuesit të saj në udhëheqjen parlamentare.
Nga ana tjetër, Ministri në detyrë i Financave, Hekuran Murati, tha se kandidatura e duhur për pozitën e nënkryetarit nga komuniteti serb është Nenad Rashiq, përfaqësues i partisë Për Liri, Drejtësi dhe Mbijetesë.
“Rashiq i mori 56 vota në seancën e kaluar. Nevojiten edhe pesë vota nga 52 deputetët shqiptarë”, deklaroi Murati, duke bërë thirrje për mbështetje për këtë kandidaturë në mënyrë që të përmbyllet me sukses procesi i konstituimit të Kuvendit.
Seanca e sotme ka një pikë të vetme në rend dite, zgjedhjen e nënkryetarit të Kuvendit nga radhët e komunitetit serb. Pas publikimit të aktgjykimit të Gjykatës Kushtetuese, i cili sqaroi se mungesa e një kandidature apo mosvotimi nuk mund të bllokojë procesin, pritet që Kuvendi të përmbyllë konstituimin dhe të hapet rruga për formimin e qeverisë së re.
Nëse kjo ndodh gjatë ditës së sotme, afati kushtetues për formimin e Qeverisë do të nisë të rrjedhë nga nesër, duke vendosur në lëvizje proceset që do të çojnë drejt krijimit të kabinetit të tretë qeveritar nën udhëheqjen e Albin Kurtit.
