Pas kontrolleve nga SPAK, biznesmeni izraelit, Ron Yeffet, po përballet me telashe edhe në Shtetet e Bashkuara të Amerikës.
Përplasj...
KOSOVA
Opozita e Kosovës bojkoton seancën në kuvend, Kurti kërkesë deputetëve: Të votojmë marrëveshjet!
PiranjatPërditësimi i fundit 19 Nëntor 2025, 12:59
Kryetari i Kuvendit të Kosovës, Dimal Basha, e nisi seancën plenare, teksa nuk munguan polemikat mes palëve, ndërsa diskutohen Qeveria e re, buxheti dhe komisionet.
Të pranishëm në sallë ishin vetëm deputetët e Lëvizjes Vetëvendosje, si dhe disa nga pakicat joserbe, gjë që pritet që seanca të dështojë. PDK, LDK dhe AAk refuzuan të merrnin pjesë në seancë, duke shprehur votën kundër.
Kryeministri në detyrë, Albin Kurti, u ka bërë thirrje deputetëve të të gjitha partive të shkojnë në Kuvend për të votuar për marrëveshjet ndërkombëtare dhe buxhetin vjetor.
Kurti tha se Kosova do t’i “humbë mbi 200 milionë euro pakthyeshëm”, nëse nuk ratifikohen sot marrëveshjet me Bashkimin Evropian për Planin e Rritjes dhe ato me Bankën Botërore.
Ai tha se do të humbin “88 milionë euro nga Plani i Rritjes dhe 120 milionë euro nga këto tri marrëveshje me Bankën Botërore”, informon Radio Evropa e Lirë.
“Ju e dini shumë mirë, se për ratifikim të marrëveshjeve ndërkombëtare, nuk mjaftojmë ne, edhe po ta kishim Qeverinë. Por, interesi publik dhe e mira shoqërore e kërkojnë të jemi aty bashkë”, tha Kurti.
“U bëj thirrje të gjithë deputetëve pa dallim partie, që sot të jemi këtu në Kuvend, ku na ka sjellë populli, t’i votojmë tri marrëveshjet ndërkombëtare”, tha Kurti.
Deputeti Armend Zemaj tha se Lidhja Demokratike e Kosovës nuk do të marrë pjesë në seancën për buxhetin, pasi ajo nuk ishte thirrur me konsultim paraprak dhe se si e tillë është në shpërputhje me rendin kushtetues.
Ai tha se pikat e rendit të ditës është dashur të kalonin nëpërmjet një diskutimi serioz paraprak.
“Kjo seancë nuk është asgjë tjetër përveçse mjet i zakonshëm populist dhe veprim politik me të cilin LVV është mësuar të veprojë”, tha ai.
“Për ta fshehur mungesën e numrave për krijimin e institucioneve, sot po provohet treni i fundit, një seancë e paligjshme, jologjike dhe plotësisht në kundërshtim me rendin kushtetues dhe me logjiken dhe praktikën parlamentare, vetëm që Kurti dhe LVV të zhveshen nga përgjegjësitë e tyre”, shtoi Zemaj.
Deputetja Vlora Çitaku tha për media në Kuvend se Partia Demokratike e Kosovës nuk do të marrë pjesë në seancën për buxhetin.
“Kjo seancë, edhe sikur mos të ishte skemë për ta mbuluar krizën në të cilën po e fut vendin Qeveria në ikje, është e paligjshme dhe tërësisht në kundërshtim me rendin kushtetues të Kosovës”, tha Çitaku.
Ajo tha se kjo seancë është “farsë, nuk është zgjidhje, por tentim për ta mbuluar dështimin”, nga Lëvizja Vetëvendosje.
Deputeti Përparim Gruda tha se u fut në seancë për ta përfaqësuar Partinë Demokratike të Kosovës, për të treguar se “ne nuk po marrim pjesë në të dhe pse për ne kjo seancë është jokushtetuese”.
“Kjo seancë do të mbahet në mend në historinë e Kosovës, për të cilën të gjithë ne e dimë që është e paligjshme dhe jokushtetuese”, tha Gruda.
“Askund Kuvendi nuk mund të mbajë seancë pa e zgjedhur Qeverinë”, shtoi ai.
Fjalimi i tij u shoqërua me ndërhyrje dhe kundërshtime nga deputetët e Lëvizjes Vetëvendosje, të cilët e akuzuan se po bënte “propagandë” politike.
Basha: Jam i hapur për takim me partitë lidhur me formimin e komisioneve
Kryetari i Kuvendit të Kosovës, Dimal Basha, tha gjatë seancës se është i gatshëm që sa më parë ta thërrasë një mbledhje të Kryesisë së Kuvendit me përfaqësuesit e të gjitha subjekteve politike.
“Të vazhdojmë së paku me formimin e katër komisioneve të përhershme dhe, në këtë mënyrë, të mundësohet votimi i marrëveshjeve ndërkombëtare, buxhetit vjetor, buxhetit të tri komunave dhe i raportit të RTK-së për t’ia ndarë mjetet transmetuesit publik”, tha Basha.
Ai nguli këmbë se çështjet e kësaj seance “nuk kanë të bëjnë me veprime politike”.
“Prandaj, përsëri u bëj thirrje të gjitha subjekteve politike t’i analizojnë me maturi në kontekst të rrethanave shtetërore që gjendemi dhe pritet e qytetarëve tanë, të cilët nuk e meritojnë ta pamundësojnë votimin e këtyre ligjeve jetike për shkak të inateve të paarsyeshme politike”, tha Basha.
