Pak orë para protestës së paralajmëruar, Policia ka rrethuar me barriera metalike perimetrin pranë Parlamentit, nga Xhamia e Namazgja...
KOSOVA
Theri me thikë gruan dhe të bijën, një muaj paraburgim ndaj autorit
PiranjatPërditësimi i fundit 19 Tetor 2025, 08:12
Gjykata Themelore e Prizrenit ka caktuar 30 ditë paraburgim ndaj një burri që akuzohet për therjen me thikë të bashkëshortes dhe vajzës së tij të mitur në rrugën “Rexhep Kabashi” në Prizren, të premten. Lajmin e ka konfirmuar për mediat zëdhënësi i gjykatës, Marcel Lekaj, i cili tha se ndaj të dyshuarit rëndojnë dy akuza penale, vrasje në tentativë dhe armëmbajtje pa leje. Vendimi për paraburgim u mor gjatë seancës dëgjimore të mbajtur të shtunën në orën 11:00.
Sipas Prokurorisë Themelore të Prizrenit, Policia e Kosovës ka marrë informacionin për ngjarjen rreth orës 00:20 të së premtes dhe menjëherë ka ndërhyrë në vendin e ngjarjes. Aty është gjetur bashkëshortja e të dyshuarit me lëndime të rënda trupore dhe gjakderdhje të shkaktuara me mjet të mprehtë. Viktima e dytë, vajza e mitur, është gjetur në katin e sipërm të ndërtesës me plagë të ngjashme. Të dyja janë dërguar për trajtim mjekësor në Spitalin Rajonal të Prizrenit.
Shefi i Emergjencës në spitalin e Prizrenit, Hekuran Veçgishti, ka konfirmuar se gjendja shëndetësore e viktimave është aktualisht stabile, ndonëse ato ndodhen ende në kujdes intensiv.
Gjatë intervenimit policor, i dyshuari është identifikuar dhe arrestuar në hyrje të banesës dhe është shoqëruar në stacionin policor për procedura të mëtejshme. Një dëshmitar që ndodhej pranë vendit të ngjarjes ka treguar për mediat se ka dëgjuar zhurma dhe piskama dhe ka parë gruan e gjakosur duke kërkuar ndihmë. Ai tha se pas ndërhyrjes së fqinjëve dhe policisë, është zbuluar edhe vajza e therur në korridorin e katit të sipërm.
